असार १७, काठमाडौं । संस्कृति, पर्यटन तथा नागरिक उड्डयनमन्त्री जीवनराम श्रेष्ठले भगवान् राम र सीतासँग जोडिएका धार्मिक स्थलहरूलाई स्थलमार्गबाट जोड्ने रामायण सर्किटले नेपाल–भारतको सम्बन्ध अझ मजबुत बन्ने विश्वास व्यक्त गरेका छन् । बिहीबार सिंहदरबारस्थित मन्त्रालयमा बधाई दिन आएकी भारतीय दूतावासका मिसन उपप्रमुख नाग्मग्या सी खम्पासँगको भेटमा मन्त्री श्रेष्ठले सो कुरा बताएका हुन् । भेटमा नेपाल–भारतका हवाई सेवासम्बन्धी अन्य विषयमा पनि छलफल भएको थियो । खम्पाले मन्त्री श्रेष्ठलाई कार्यकालको शुभकामना व्यक्त गरेकी थिइन् । मन्त्री श्रेष्ठले रामायण सर्किटले नेपाल र भारतमा धार्मिक पर्यटनको प्रवर्द्धन हुनुका साथै दुई देशविचको सम्बन्ध अझ प्रगाढ हुने विश्वास व्यक्त गरे । मन्त्री श्रेष्ठले गौतम बुद्ध अन्तर्राष्ट्रिय विमानस्थलका लागि पश्चिम क्षेत्रबाट प्रवेश विन्दु उपलब्ध गराउने विषयमा छलफल गरी निष्कर्ष निकाल्नका लागि नेपाल–भारतबीच संवाद गर्नुपर्ने बताएका छन् । महेन्द्रनगर, नेपालगञ्ज र भैरहवाबाट हवाई प्रवेश बिन्दु उपलब्ध गराउनका लागि आवश्यक छलफल गर्नुपर्ने मन्त्री श्रेष्ठले बताएका थिए । त्यसैगरी, सो अवसरमा दुई देशको पर्यटन प्रवर्द्धनका विषयमा समेत छलफल भएको थियो । सांस्कृतिक, साहसिक तथा खेल पर्यटन प्रवर्द्धनका विषयमा समेत छलफल भएको थियो ।