भदौ २, काठमाडौं । पर्यटनमन्त्री जीवनराम श्रेष्ठले काठमाडौंको प्रमुख सांस्कृतिक उत्सव इन्द्रजात्रा व्यवस्थापनबारे सरोकारवालासँग छलफल गरेका छन् । भाद्र शुक्ल चतुर्दशीका दिन पर्ने इन्द्रजात्रामा सुरक्षा लगायत अन्य पक्षको व्यवस्थापनबारे काठमाडौं महानगरका जनप्रतिनिधि, स्थानीय प्रशासन, सुरक्षा निकाय, गुठी संस्थान, स्थानीय गुठीयारलगायतसँग छलफल गरेका हुन् । काठमाडौंवासीको महत्वपूर्ण चाडका रूपमा रहेको इन्द्रजात्रालाई विश्वव्यापी रुपमा चिनाएर पर्यटनसँग जोड्नुपर्ने उनको भनाइ छ । इन्द्रध्वजोत्थान पर्व राष्ट्रिय संस्कृतिका रुपमा विकसित भइसकेको छ,’ मन्त्री श्रेष्ठले भने, ‘इन्द्रजात्रा अवलोकनमा सहभागि हुनेलाई सहज हुने गरी व्यवस्थापन गर्नुपर्छ ।’ राष्ट्रपति, मन्त्री र नगरवासीको सहभागितामा इन्द्रध्वजोत्थान गर्ने गरिन्छ । यसपटक विश्वका विभिन्न सहरका मेयरसहित विदेशी पाहुनालाई पनि निमन्त्रणा गरिएको छ । इन्द्रजात्रासँगै गणेश, भैरव र कुमारीको रथयात्रा, नाच, गान, झाँकी व्यवस्थापन, ट्राफिक र सुरक्षा व्यवस्थापनमा पनि ध्यान दिनुपर्ने मन्त्री श्रेष्ठले बताए । नेपाली मौलिक मूर्त–अमूर्त संस्कृति जीवन्त राख्ने र विश्वमा नै यसको महत्व फैलाउने अवसरका रुपमा इन्द्रजात्रालाई लिनुपर्ने उनको भनाइ छ । काठमाडौंका मेयर बालेन्द्र साहले इन्द्रजात्रा व्यवस्थापनमा महानगरले गरिरहेको कामबारे जानकारी गराएका थिए । साहले संस्कृति र सम्पदा क्षेत्र संरक्षणमा तीनै तहका सरकारबीच सहकार्य हुनुपर्ने बताए । ८ दिनसम्म मनाइने इन्द्रजात्रामा वसन्तपुर क्षेत्रमा पुलकिशी, श्वेत भैरव, आकाश भैरव, इन्द्र, गणेश, कुमारीलगायतको जात्रा देखाइनेछ । कुमारी गणेश र भैरवको रथारोहण, देवी र लाखे नाच प्रदर्शन लगायत उत्वस गरिन्छ । राष्ट्रप्रमुख जात्रामा सरिक भएर टीका र प्रसाद ग्रहण गर्दा देशमा सुख शान्ति हुन्छ भन्ने मान्यता छ ।