जनजाति शिक्षा संस्कार केन्द्रको आचार्य प्रशिक्षण वर्ग चितवनमा प्रारम्भ भएको छ ।
२०७९ भाद्र १५ गतेदेखि १९ गतेसम्मका लागि सञ्चालित वर्गको उद्देश्य चेपाङ बस्तीका स्थानीय व्यक्तिहरूलाई अनौपचारिक शिक्षाको शिक्षकका रूपमा प्रशिक्षित गराउनु रहेको जनजाति कल्याण आश्रम नेपालका राष्ट्रिय महासचिव प्रेम थुलुङले बताउनुभयो ।
विशेष गरी चेपाङ बस्तीमा शिक्षाको पहुँच कम भएकोतर्फ कल्याण आश्रमको ध्यान केन्द्रित भएको उल्लेख गर्दै महासचिव थुलुङले त्यहाँका बालबालिकासम्म शिक्षाको ज्योति पुर्याउने एउटा प्रयासका रूपमा जनजाति शिक्षा संस्कार केन्द्र सञ्चालनमा ल्याइएको बताउनुभयो ।
चेपाङहरूको मुख्य बसोवास रहेको चितवन, मकवानपुर लगायतका जिल्लाका गाउँमा सरकारी स्कुलसम्म पुग्न विद्यार्थीले बिहान–बेलुकै दुई–तीन घण्टासम्म पैदल हिँड्नुपरेको तथ्य उजागर गर्दै उहाँले ती विद्यार्थीका लागि सहयोगी शिक्षकका रूपमा समेत शिक्षा संस्कार केन्द्रका आचार्यले टेवा पुर्याउने विश्वास लिएको उल्लेख गर्नुभयो ।
“शिक्षाको अभावमा एकातिर स्वास्थ्य र आर्थिक विकास समेत कमजोर भइरहेको छ भने विधर्मीहरूले धर्मपरिवर्तन गराएर त्यसैको गलत फाइदा उठाइरहेका छन्,” थुलुङले भन्नुभयो, “जनजातिको सर्वाङ्गीण विकास पर–संस्कृतिको शरण नलिइकन आफ्नै सांस्कृतिक वातावरणमा हुन सकोस् भनेर जनजाति कल्याण आश्रम नेपालले यो आयाम शुरु गरेको हो ।”
चितवनको भरतपुरमा शुरु भएको वर्गबाट हाल चेपाङ गाउँकै १८ जना युवा–युवतीलाई आचार्यका रूपमा प्रशिक्षण दिइँदैछ । भाषा, गणित, विज्ञान तथा नैतिक शिक्षा विषयलाई कसरी प्रभावकारी ढङ्गले शिक्षण गर्ने भन्नेबारे पनि प्रशिक्षण दिइने महिला आयामकी सह–प्रमुख इन्दु ताजपुरियाले बताउनुभयो ।
वर्ग–अन्तर्गत दिनभरिका विविध प्रकारका प्रशिक्षणसँगै जनजाति समाजको लोककला र संस्कृति, आचार्यहरूमा हुनुपर्ने गुण र शिक्षा तथा संस्कार प्रवर्द्धनमा उनीहरूको भूमिका, कल्याण आश्रमका आयाम तथा कार्य, वर्तमान समयमा बाल–बालिकाका लागि संस्कारको आवश्यकता, संवेदनशील क्षेत्र एवं जातिबीच कल्याण आश्रमको कार्यको आवश्यकता आदिबारे पनि प्रबोधन दिइने आयोजकले जनाएका छन् ।
जनजाति कल्याण आश्रम, नेपाल विक्रम संवत् २०५९ सालदेखि जनजातिहरूको सर्वाङ्गीण विकासको निम्ति देशका विभिन्न जिल्लाहरूमा विभिन्न सेवाकार्य सञ्चालन गर्दै आइरहेको छ । ग्रामीण एवं दुर्गम क्षेत्रमा वसोवास गर्दै आइरहेका आर्थिक रूपले विपन्न जनजातिहरू विकासको मूलधाराबाट वञ्चित भएको तथा उनीहरूको समुचित विकास हुन नसकेको कारण कैयौँ देश–विरोधी शक्तिहरू उनीहरूको अवाञ्छित उपयोग गरिरहेका छन् । यसको परिणामस्वरूप धर्मान्तरण, सामाजिक वैमनस्यता आपसी द्वन्द्व आदि घातक समस्या उत्पन्न हुँदैछन् ।
कल्याण आश्रम विभिन्न सेवा कार्य/प्रकल्पहरूको माध्यमबाट जनजातिहरूको शिक्षा, स्वास्थ्य एवं स्वावलम्बनलाई सुदृढ पार्ने कार्य गर्दै आईरहेको छ ।
