काठमाडौँमा निर्वाचनका लागि उचित सुरक्षा प्रबन्ध – प्रमुख जिल्ला अधिकारी
कात्तिक २१, काठमाडौँ । आसन्न मंसिर ४ गते हुने प्रदेश तथा प्रतिनिधि सभाको निर्वाचनलाई लक्षित गरी काठमाडौँमा शान्ति सुरक्षाको उचित प्रबन्ध मिलाएको प्रमुख जिल्ला अधिकारी घनश्याम उपाध्यायले बताएका छन् ।
सोमबार नेपाल पत्रकार महासंघ काठमाडौँ शाखा र जिल्ला निर्वाचन आयोगले संयुक्त रुपमा आयोजना गरेको एक कार्यक्रममा उनले सो कुरा बताएका हुन् । काठमाडौँ जिल्लाभित्रका ३२० मतदान स्थल र ७७१ वटा मतदान केन्द्रमा सुरक्षाको हिसावले चुस्तदुरुस्त बनाउन तीन वटै सुरक्षा निकायसंग समन्वय गरिसकेको बताए । नागरिकलाई सुरक्षाको प्रत्यभूति गराउन कुनै बाँकी कसुर नराख्ने बताउँदै शान्तिपूर्ण वातावारणमा काठमाडौँका मतदातालाई मतदान गराउने प्रबन्ध मिलाएको प्रमुख जिल्ला अधिकारी उपाध्यायले जानकारी दिए ।
काठमाडौँका सबै मतदान केन्द्रमा मतदान अधिकृत खटाईसकेको र प्रत्येक वडामा मतदान शिक्षा कार्यक्रम सुरु गर्ने तयारीमा रहेको बताए । स्थानीय तहको सहयोगमा मतदान शिक्षा कार्यक्रम सञ्चालन गरिने प्रमुख जिल्ला अधिकारी उपाध्यायले बताए । मतदान शिक्षाबाट कुनै पनि नागरिक बञ्चित नहोस भनेर अभियानलाई तिब्रता दिन निर्वाचन आयोगले बनाएको आचारसंहितालाई निर्वाह गरी काम गरिने बताए ।
निर्वाचनमा सञ्चार माध्यमको भूमिका विषयक मिडिया अभिमुखीकरण सहितको सो कार्यक्रममा नेपाल प्रेस काउन्सिलका पूर्व अध्यक्ष भवानी बरालले कार्यपत्र प्रस्तुत गरेका थिए । कार्यपत्रमा वर्तमान मिडिया र पत्रकारिताको अवस्था र चुनौती सहित निर्वाचनमा हुने चुनौतिका विषयमा चर्च गरेका थिए । निर्वाचन आयोगले मिडियामैत्री वातावरण निर्माण विशेष भूमिका निभाउनेपर्ने तर्क सहित आचारसंहिताको नाममा वाक स्वतन्त्रताको पक्षमा अवरोध नपु¥याउन सुझाएका थिए । सञ्चारकर्मी तथा मिडियाले पनि निर्वाचनका बेला संवदशील भएर समाचार प्रकाशन तथा प्रसारण गर्नुपर्ने कार्यपत्र प्रस्तुतकर्ता बरालले सुझाए ।
पत्रकार राजनीतिक दलको घोषणापत्रको चर्चा र प्रचार मात्र नभई मुद्धाको विषयवस्तु बनाई आफ्नो दृष्टिकोणसहितको विषयबस्तु सम्प्रेसन गर्नुपर्ने बताए । कार्यक्रममा विभिन्न सञ्चार माध्यममा आवद्ध पत्रकार तथा निर्वाचन आयोगका मतदान केन्द्र अधिकृत र कर्मचारीहरुको सहभागी रहेको थिए ।