पुस ७, भरतपुर । चितवनको भरतपुरमा आजदेखि हर्न निषेध गरिएको छ । भरतपुर महानगरपालिकाले साना तथा ठूला सवारीसाधनको समेत व्यवस्थापन गर्ने भएको छ । बढ्दो सहरीकरणले सवारीसाधन व्यवस्थापनमा समस्या देखिएसँगै महानगरले केन्द्रीय बस टर्मिनल र नारायणगढ बसपार्कमा आजदेखि अनिवार्य पार्किङको व्यवस्था गरेको छ । एक साताअघि महानगरपालिकामा बसेको सरोकारवालाको बैठकले सवारीसाधन व्यवस्थापन गर्न विभिन्न निर्णय गरी आजदेखि कार्यान्वयनमा ल्याउने समझदारीसहित निर्णय गरेको थियो । उक्त निर्णयानुसार पूर्वबाट काठमाडौं–पोखरा जाने यात्रीवाहक बस, मिनिबस, माइक्रोलगायत भाडाका सवारीसाधनका यात्री चढाउने तथा झार्ने कार्य केन्द्रीय बसपार्कबाट बाइपास सडक प्रयोग गरी आँपटारीबाट बाहिरिनुपर्नेछ । पूर्वबाट पश्चिम बुटवल, धनगढी, महेन्द्रनगरसम्म जाने यात्रीवाहक सवारीसाधनका यात्री चढाउने तथा झार्ने काम केन्द्रीय बसपार्कमा गरी चौबीसकोठी, लाइन्सचोक हुँदै पुलचोकबाट बाहिरिने व्यवस्था गरिएको छ । पश्चिम जाने यात्रीवाहक सवारीसाधनले केन्द्रीय बर्सपार्कबाट यात्री चढाउने तथा झार्ने गरी जानुपर्ने नियम बनाइएको छ । यस्तै, भरतपुर महानगरपालिका क्षेत्रको रिङरोडमा चल्ने सवारीसाधनको पार्किङस्थल नारायणगढ बसपार्क हुनेछ । भरतपुरबाट टाँडी, पर्सा, भण्डरा, लोथरसम्म जाने यात्रीवाहक बसका लागि पार्किङ केन्द्रीय बसपार्कमा गर्नुपर्ने व्यवस्था मिलाइएको छ । नारायणगढ बजारको पुलचोकबाट पोखरा बसपार्कतर्फ जाने ट्रक र लामो दूरीका बस प्रवेशमा निषेध गरिएको छ । काठमाडौं र पोखराबाट पूर्व वा पश्चिमतर्फ जाने यात्रीवाहक सवारीसाधन ट्रक, लहरी, टिपरजस्ता मालवाहक सवारीसाधनलाई आँपटारीबाट नारायणघाट बजारतर्फ जान निषेध गरिएको छ । महानगरको गोन्द्राङदेखि पुलचोक आँपटारीसम्मको बजार क्षेत्रमा हर्न बजाउन निषेध गरिएको छ । यस्तै, नारायणगढ तथा भरतपुरमा रहेका राजमार्गको पेटी तथा सडकको दायाँबायाँ भागमा निजी तथा भाडाका सवारीसाधनलाई पार्किङमा निषेध गरिएको छ । भरतपुर महानगरपालिकाका प्रमुख रेनु दाहालले महानगरको परिकल्पनाअनुसार सवारीसाधनलाई व्यवस्थापन गर्न लागिएको बताइन् । बाहिर छरिएर राखिने सवारीसाधनका कारण सहरको सुन्दरतामा ह्रास आएको र आवागमन समेत प्रभावित भएका कारण बजार र पार्किङ व्यवस्थापनको काम गर्न लागिएको उनले जानकारी दिइन् । जिल्ला ट्राफिक प्रहरी कार्यालयका प्रमुख धर्मबहादुर अधिकारीले आजदेखि ट्राफिक व्यवस्थापनको काम परिवर्तन हुने र दुई बसपार्क पूर्ण रूपमा सञ्चालनमा आउने बताए । उनले पटक–पटक यातायात व्यवसायीसँग छलफल गरेर निर्णय कार्यान्वयन गर्न लागिएको बताए । रासस