पुस १०, काठमाडौं । नयाँ सरकार गठनका लागि गठबन्धनमा प्रस्तुत हुने रणनीति तय गर्न नेकपा माओवादी केन्द्रका शीर्ष नेताहरु आन्तरिक छलफलमा जुटेका छन् । राष्ट्रपति विद्यादेवी भण्डारीले नयाँ सरकार गठनका लागि आह्वान गरेको एक साताको समय सकिँदै गर्दा गठबन्धनका शीर्ष नेताहरु आन्तरिक छलफलमा जुटेका हुन् । आज साँझ पाँच बजेसम्म सहमतिलाई अन्तिम रुप दिनुपर्ने बाध्यतामा रहेको पाँचदलीय सत्तागठबन्धन दलहरूले आफ्नै नेतृत्वमा आगामी नयाँ सरकार गठन गर्ने निर्णय गरी विभिन्न प्रयासमा जुटिरहेका छन् । बालुवाटार नेपाली कांग्रेसका शीर्ष नेताहरु र खुमलटारमा माओवादी केन्द्रका शीर्ष नेताहरु गठबन्धनमा प्रस्तुत हुने रणनीति तय गर्न छलफलमा जुटेका छन् । दुबै पार्टीका नेताहरुको छलफल सकिएसँगै गठबन्धनको बैठक बस्ने तयारी छ । गठबन्धनको नेतृत्वकर्ता दल कांग्रेसले आफ्नै नेतृत्वमा नयाँ सरकार गर्नका लागि पहल गर्ने रणनीतिमा छ । यता माओवादी केन्द्र पनि पहिलो कार्यकालका लागि सरकारको नेतृत्व आफ्नै दलले पाउनुपर्ने अडानमा छ । निर्वाचनमा कुनै पनि दलले स्पष्ट बहुमत प्राप्त गरेको नदेखिएकाले राष्ट्रपतिले नेपालको संविधानको धारा ७६ को उपधारा (२) बमोजिम प्रतिनिधिसभामा प्रतिनिधित्व गर्ने दुई वा दुईभन्दा बढी दलहरूको समर्थनमा बहुमतप्राप्त गर्न सक्ने प्रतिनिधिसभाको सदस्यलाई प्रधानमन्त्री नियुक्त गर्नका लागि पुस १० गते साँझ ५ बजेभित्र दाबी पेस गर्न आह्वान गरेकी थिइन् ।