पुस १३, काठमाडौं । संघीय संसद सचिवालयले संसदको अधिवेशनका लागि आफू तयार रहेको बताएको छ । संचारकर्मीसँग कुरा गर्दै संघीय संसद सचिवालयका सहायक प्रवक्ता एवं सूचना अधिकारी दशरथ धमलाले सबै दलको संसदीय दलको कार्यालय व्यवस्थापन भइसकेको बताउनुभएको हो । सबै तयारी समेत पूरा भइसकेको उहाँको भनाइ छ । सहायक प्रवक्ता धमलाले सभा सञ्चालनका लागि आवश्यक प्राविधिक, व्यवस्थापकीय, प्रशासनिक कुराहरु सकिएको बताउनुभयो । सरकारको सिफारिसमा राष्ट्रपति विद्यादेवी भण्डारीले यहि पुस २५ गते दिउँसो १ बजे पहिलो संसद अधिवेशन आह्वान गर्नुभएको छ । सहायक प्रवक्ता धमलाले संसदका पदाधिकारीहरुलाई दिइने सवारी साधनको भने अभाव रहेको बताउनुभयो । सचिवालयसँग स्रोत नभएको भन्दै उहाँले अर्थ मन्त्रालयसँग पटक–पटक स्रोत माग्दा पनि उपलब्ध हुन नसकेको गुनासो गर्नुभयो । उहाँले भन्नुभयो,–‘अधिवेशन आह्वान हुन्छ भन्नेमा तयारी अवस्थामा छौं । संसदीय दलका कार्यालयको व्यवस्थापन भइसकेको छ । सभा सञ्चालनका लागि आवश्यक प्राविधिक, व्यवस्थापकीय र प्रशासनिक दृष्टिकोणले हेर्ने सम्पूर्ण कुराहरु सकिएको छ । गर्नुपर्ने तयारी प्रायः सकिसकेका छौं।’ सहायक प्रवक्ता धमलाले संघीय संसद सचिवालयमा स्रोतको अभाव हुँदा पनि सरकार र अर्थ मन्त्रालय नजर अन्दाज गरेर बसेको आरोप लगाउनुभयो ।