जेठ ४, काठमाडौँ । सञ्चार तथा सूचना प्रविधिमन्त्री रेखा शर्माले डिजिटल सेवाको पहुँच हुने र नहुनेबिचको खाडल बढ्दै गएकाले त्यसलाई कम गर्न लक्ष्य निर्धारण गर्नुपर्ने बताएकी छन् । अन्तर्राष्ट्रिय दूरसञ्चार दिवसका अवसरमा राजधानीमा बुधबार आयोजित ‘स्पेक्ट्रम व्यवस्थापन सम्मेलन’ मा उहाँले डिजिटल खाडल पूरा गर्न आवश्यक नीतिगत प्रावधान र लगानीको स्पष्ट लक्ष्य निर्धारण गर्न आवश्यक भइसकेको बताईन् । “एकातिर फाइभजी, सिक्सजीको कुरा आइरहेको छ, अर्कोतिर कतिपयले दूरसञ्चार सेवा नै प्रयोग गर्न नसक्ने अवस्था छ,” उहाँले भन्नुभयो, “यस्तो डिजिटल खाडल पूरा गर्न के गर्नुपर्ने हो, ठोस लक्ष्य बनाएर अघि बढौँ ।” डिजिटल खाडलको समस्या समाधान गर्न मन्त्रालयले आवश्यक सबै किसिमको सहयोग गर्ने उहाँले प्रतिबद्धता पनि व्यक्त गर्नुभयो । दूरसञ्चार सेवाको पहुँच बढ्दै जाने तर आम्दानी घट्दै जाने पछिल्लो अवस्थाको कारण पत्ता लगाउन जरुरी भइसकेको पनि मन्त्री शर्माको भनाइ थियो । पहुँच बढे अनुसार आम्दानी बढाउन पर्नेतर्फ अबको प्राथमिकता हुनुपर्ने उहाँले बताउनुभयो । त्यस्तै दूरसञ्चार क्षेत्रको गुणस्तर बढाई समग्र सूचना प्रविधिको प्रयोग र त्यसमार्फत मुलुककै राजस्व बढाउने आधार सिर्जना गर्नेतर्फ सबैको ध्यान पुग्नुपर्ने उहाँको भनाइ थियो ।