पुष ११, काठमाडौं । गाजामा इजरायली आक्रमणबाट पछिल्लो २४ घण्टामा २४१ जनाको मृत्यु भएको छ। गाजाको स्वास्थ्य मन्त्रालयका अनुसार ३८२ जना घाइते भएका छन् । यसैबीच प्यालेस्टाइनी राष्ट्रपति महमूद अब्बासले आफ्ना नागरिकहरूविरुद्ध भएको युद्धलाई ‘गम्भीर अपराध’ भनेका छन्। उनले युद्ध रोक्न आग्रह गरे पनि इजरायल त्यसो गर्ने पक्षमा छैन। इजरायलका राष्ट्रपति बेन्जामिन नेतन्याहुले शान्तिका लागि हमासको अन्त्य जरुरी रहेको भन्दै आक्रमण जारी रहने बताएका छन् । उनले हमासबाट प्यालेस्टिनी आतंकवादीबाट मुक्त बनाउने दाबी गरेका छन् । तर संयुक्त राष्ट्र संघले भने इजरायलको आक्रमणबाट भएको मानवीय र भौतिक क्षतिप्रति दुःख व्यक्त गरेको छ । संयुक्त राष्ट्रसंघको मानवअधिकार कार्यालयका प्रवक्ता सेफ मागांगेका अनुसार इजरायलको आक्रमणबाट गाजा क्षेत्रमा सडकमा भारी क्षति पुगेकाले एम्बुलेन्स र राहत सामग्री पठाउन पनि गाह्रो भइरहेको छ । हमासले गत ७ अक्टुबरमा इजरायलमा आक्रमण गरेपछि त्यसको जवाफ स्वरुप इजरायलले हमासको प्रभाव क्षेत्र मानिने गाजामा आक्रमण जारी राखेको छ । इजरायलको आक्रमणबाट २१ हजार जनाको मृत्यु भइसकेको र ५४ हजारभन्दा बढी घाइते भएको छ। हमासको आक्रमणमा १ हजार २ सय इजरायली नागरिक मारिएका थिए भने कयौँ बन्धक बनेका थिए। त्यसयता सुरू भएको युद्ध बीचमा पाँच दिन रोकिएको थियो। त्यस क्रममा हमास र इजरायलले एकअर्काका बन्धकलाई रिहा गरेका थिए।