पुष २४, काठमाडौं । कोशी प्रदेशको सभामुखमा राष्ट्रिय प्रजातन्त्र पार्टीका प्रदेशसभा सदस्य अम्बरबहादुर विष्ट निर्विरोध चयन भएका छन् ।  विगत पाँच महिनादेखि रिक्त रहेको सभामुखका लागि प्रदेशका मुख्यमन्त्री केदार कार्की, नेकपा एमाले, गठबन्धन दलबीचको सहमति र प्रयासले बिष्टको चयन भएको हो । मंगलवार विराटनगरस्थित प्रदेश सभामा सभा सञ्चालन गरिरहेकी उपसभामुख सृजना दनुवारले विष्ट सभामुखमा चयन भएको घोषणा गरेकी हुन् । बिष्टलाई सभामुख चयन गरेसँगै मुख्यमन्त्री कार्कीले कोशी प्रदेशमा दलबीच आन्तरिक मनमुटावभन्दा पनि सहकार्य र एकता रहेको सन्देश प्रवाह गर्न सफल भएको बताए । यससँगै मंगलवार नेकपा एमाले संसदीय दलको बैठकले समेत समर्थन गर्ने जनाएपछि बिष्टका लागि सभामुखको ढोका सहज भएको थियो । सभामुखका लागि बिहानबाट प्रदेश सभा सचिवालयले निर्वाचन कार्यतालिका सार्वजनिक गरेको थियो । यद्यपि निर्धारित ३ बजेको निर्वाचन समयसम्म बिष्टबाहेक अन्यको उम्मेदवारी परेन् । बिष्टको उम्मेदवारीमा प्रस्तावक भक्तिप्रसाद सिटौला र समर्थकमा प्रेमराज थाम्सुहांग रहेका थिए । बिष्ट झापाबाट समानुपातिकतर्फबाट प्रदेश सभा सदस्य भएका हुन् । यसअघि, प्रदेशमा गत साउन १६ गते बाबुराम गौतमले सभामुखबाट राजीनामा दिएपछि उपसभामुख दनुवारले सभा सञ्चानल गर्दै आएकी थिइन् ।