फागुन १८, काठमाडौं । सिन्धुली जिल्लाको कमलामाई नगरपालिका–३ चपौलीस्थित ‘ राष्ट्रिय कला सङ्ग्रहालय सिन्धुली कलाघर’ पर्यटन गन्तव्य बन्दै गएको छ । कला संस्कृतिको जगेर्ना गर्ने उद्देश्यले निर्माण गरिएको राष्ट्रिय कला सङ्ग्रहालयले समग्रमा नेपालको विशेषतालाई परिभाषित गर्दछ । सिन्धुली कलाघरमा सिर्जना गरिएको परम्परागत, मौलिक, लोपोन्मुख, रैथाने र आधुनिक कला संस्कृतिको अवलोकन गर्न स्वदेशी तथा विदेशी पर्यटकको घुइँचो लाग्दै गएको स्थानीय बताउछन् । कला सिन्धुलीका अध्यक्ष तथा कलाकार नेपालीबाबु सुमनका अनुसार विदाको समयमा दैनिक पाँच सय सम्म अवलोकनका लागि पर्यटक आउने गरेको छ । स्थानीयका अनुसार कलाघर घुम्न आउने पर्यटकलाई एकै पोशाकमा सजिएका कलाघर सिन्धुलीका युवतिले सुरुमा पञ्चेबाजाले स्वागत गर्दछन् । कुनै बेला जात विशेषले मात्र बजाउने पञ्चेबाजा पर्यटन प्रवर्धनमा गतिलो माध्यम बनेको छ । कलाघर सिन्धुलीले सुरु गरेको पञ्चेबाजा संरक्षण अभियानले त्यस क्षेत्रको पहिचान फराकिलो बनाएको छ ।कलाघरमा लोपोन्मुख हुँदै गएका काठका ठेकी, हर्पे, मदानीलगायत काठ तथा बाँसबाट निर्मित पुराना परम्परागत सामग्री, सिन्धुलीलाई चिनाउने जुनारको आकृति, लालीगुराँस, खुला आकृतिमा पञ्चेबाजाका स्तम्भ, पशुपतिनाथको मन्दिर, जानकी मन्दिर, बौद्ध स्तुपा, धरहरा र अन्य कला संस्कृतिले भरिपूर्ण बन्दै गएको छ ।बीपी राजमार्गको सोलाभञ्ज्याङबाट ऐतिहासिक सिन्धुलीगढी हुँदै पुगिने कलाघरमा जान पक्की सडक बनेकाले कलाघर सिन्धुली घुम्न आउने पर्यटकको सङ्ख्या बढ्दै गएको र कलाघरका युवतीले गाउँघरमा हुने विवाह, व्रतबन्ध जस्ता शुभकार्यमा पञ्चेबाजा बजाउन जाने, विभिन्न धार्मिक कार्यमा खैंजडी भजन गाउने तथा नाच्ने र अन्य विभिन्न सांस्कृतिक कार्यक्रम तथा नाटक प्रदर्शन पनि गर्दै आएका छन् । सिन्धुलीका अध्यक्ष सुमन थापामगर भन्छन् ‘‘मौलिक कलाको संरक्षण गर्दै नयाँ कलाको आविष्कार गर्ने गरी सांस्कृतिक विद्यालयको रुपमा सिन्धुली कलाघरलाई विकास गर्ने लक्ष्य छ ।’’ थप अध्यक्ष थापामगरले भने ‘‘सिङ्गो देशको कलालाई कलामार्फत कलैकलाले भरिएको घर बनाउने एउटा अभियान हो, जसअन्तर्गत नेपाली मौलिक कलाको संरक्षण गर्ने, सँगसँगै नयाँ कलाको आविष्कार केन्द्रको रुपमा विकास गर्ने योजना छ ।’’