ललितपुर महानगरले आजदेखि सुरु गर्यो सवारी प्रदूषण जाँच
जेठ २९, काठमाडौं । ललितपुर महानगरपालिकाले सडकमै सवारी प्रदूषण जाँच सुरु गरेको छ । यातायात व्यवस्था विभागले गर्दै आएको प्रदूषण जाँच ललितपुर महानगरले आज मंगलवारदेखि ललितपुर महानगर प्रहरी बल र यातायात व्यवस्था कार्यालयले संयुक्त रूपमा सडकमै सवारी प्रदूषण जाँच सुरु गरेको हो ।
सवारी जाँचपछि महानगरले सवारी साधनलाई स्टिकर समेत दिने गरेको छ ।
ललितपुर महानगर प्रहरी बलका प्रमुख सिताराम हाछेथुले भने, “अन्य क्षेत्रमा भइरहेको प्रदूषण रोक्नको लागि हामीले धेरै काम गरिरहेका छौँ । अब सडकमा गुड्ने गाडीको पनि हामी प्रदूषण जाँच सुरु गर्दैछौँ । यो कार्य संघीय, प्रदेश र स्थानीय सरकारले पनि गर्न पाउने भएकाले ललितपुर महानगरले पहिलो पटक सुरु गरेको हो । यसलाई हामी निरन्तरता दिन्छौँ र सवारी प्रदूषण जाँचको लागि आवश्यक पर्ने मेसिन हामी आफैँ पनि छिट्टै किन्ने छौँ ।”
सवारी प्रदूषण जाँचको हरियो स्टिकर भएका र हालै परीक्षण गरिएका सवारीलाई पुनः जाँच नगरिने, यदि कुनै सवारी प्रदूषण जाँचमा पास हुन सकेन भने एक हप्ता भित्र मर्मत गर्ने मौका दिने र ती सवारीले प्रदूषण पालना भए नभएको निगरानी यातायात व्यवस्था कार्यालयले गर्ने उनले जानकारी दिए ।