१० साउन, काठमाडौं ।राष्ट्रिय स्वतन्त्र पार्टी (रास्वपा) ले कर्णाली प्रदेशमा विशेष अभियान सञ्चालन गर्ने भएको छ । आज बिहीवार बसेको रास्वपा केन्द्रीय समितिको बैठक अनुसार अभियान विभागका प्रमुख विपिन आचार्यको नेतृत्वमा अभियान सञ्चालन गर्ने निर्णय गरिएको हो ।
आगामी भदौ दोस्रो साताबाट अभियान चलाउने तयारी छ ।
बैठकले पार्टीको विधान परिमार्जनका लागि कार्यवाहक महामन्त्री कविन्द्र बुर्लाकोटीको नेतृत्वमा ११ सदस्यीय कार्यदल गठन गरेको छ । कार्यदललाई ९० दिनको समय दिइएको रास्वपाका कार्यवाहक प्रवक्ता मनिष झाले जानकारी दिनुभयो ।
समसामयिक राजनीति, कार्यशैली लगायतका विषयमा समीक्षा गर्न क्लोज क्याम्प गर्ने रास्वपाको निर्णय छ भने अरनिको पाँडेलाई फेरि केन्द्रीय सदस्य मनोनित गरेको छ । यसअघि राष्ट्रिय योजना आयोगको सदस्य भएपछि पाँडेले रास्वपा छाड्नुभएता पनि योजना आयोगबाट राजीनामा दिएपछि पुनः पार्टीमा लाग्नुभएको छ ।
त्यसैगरी बैठकले पार्टीभित्र रहेका र उठेका धेरै विषयबारे छलफल गर्न क्लोज क्याम्पबारे छलफल भएको नेता झाले बताउनुहुँदै भन्नुभयो, “त्यो क्याम्पमा आज सभापतिले नेतृत्व गर्नुभएको छ । पार्टीका केन्द्रीय विभाग मनोनयन र अनुमोदन बाँकी सबै विभागहरूले कार्यविधि रिभ्यु गर्ने र त्यसकालागि प्रस्तुत गर्ने टिम पनि प्रस्ताव गर्ने निर्णय भएको छ ।”
यसबाहेक पार्टीमा भएका घटना, अभियोग र उठेका सबै विषयमा अध्ययन अनुसन्धानका लागि केन्द्रीय अनुशासन आयोगलाई जिम्मा दिएको रास्वपाले जनाएको छ ।