काठमाडौं, माघ २१  गते । राष्ट्रपति विद्यादेवी भण्डारीले वाङ्मय शताब्दीपुरुष सत्यमोहन जोशीको मुखाकृति अङ्कित हुलाक टिकटको प्रथम दिवसीय आवरणमा टाँचा लगाउनु भएको छ । राष्ट्रपति भवन शीतल निवासमा माघ २० गते मङ्गलबार आयोजित समारोहमा उहाँले हुलाक सेवा विभागले प्रकाशनमा ल्याएको सो हुलाक टिकटमा प्रथम दिवसीय टाँचा लगाउनुभएको हो । शताब्दीपुरुष जोशीले नेपाल राष्ट्रको गौरवलाई उचाइमा पु¥याउन दिनु भएको योगदान र कृतिहरूको उच्च कदर गर्दै उहाँको मुखाकृति अङ्कित हुलाक टिकट उहाँकै जीवनकालमा प्रकाशन ल्याउने सरकारको निर्णय अनुसार टिकट प्रचलनमा ल्याइएको हो । मन्त्रिपरिषद्को २०७६ चैत ९ गतेको निर्णय अनुसार हुलाक सेवा विभागले यो टिकट प्रकाशन गरेको हो । यो टिकटको मूल्य १० रुपियाँ दरको छ । विभागका अनुसार जोशीको मुखाकृति अङ्कित टिकट १० लाख थान छापिएको छ । कार्यक्रमलाई सम्बोधन गर्नुहुँदै सञ्चार तथा सूचना प्रविधिमन्त्री पार्वत गुरुङले शताब्दीपुरुष जोशीको तस्बिर अङ्कित हुलाक टिकट एउटा गौरवमय इतिहासको दस्तावेज भएको बताउनुभयो । उहाँले जोशी साहित्यकार, इतिहासकार, आख्यानकार तथा सामाजिक आदर्श व्यक्तित्वको रूपमा १०१ वर्षीय सक्रिय नायक भएकाले नागरिक तहबाट जीवनकालमै टिकट प्रकाशनमा आएको यो पहिलो भएको विचार व्यक्त गर्नुभयो । यसैगरी सञ्चार मन्त्रालयका सचिव हरिप्रसाद बस्यालले जोशीको जीवनीमाथि प्रकाश पार्दै मातृभाषा र राष्ट्रभाषामा लामो समयदेखि नेपाली लोकसंस्कृति, भाषा, साहित्य तथा कलाको क्षेत्रमा अनवरत शोधकार्यमा पु¥याउनुभएको अतुलनीय योगदानको कदर गर्दै हुलाक टिकट प्रकाशन गरिएको बताउनुभयो । समारोहमा राष्ट्रपति भण्डारीले जोशीद्वारा लिखित पाँचवटा कृतिको पनि विमोचन गर्नुभयो । ललितपुर महानगरपालिकाका प्रमुख चिरिबाबु महर्जनका अनुसार ती कृतिमा चारुमती पूर्णाङ्की नाटक, नेपाल–चीनको सांस्कृतिक सम्बन्ध प्राचीन समयदेखि अरनिको समयसम्म, ललितपुरको कात्तिक नाचको पृष्ठभूमि र अरनिको श्वेत चैत्य तथा अङ्ग्रेजी भाषामा प्रकाशित ललितपुर सिटी अफ टे«डिसनल डान्स, ड्रामा एन्ड म्युजिक छन् । सोही समारोहमा राष्ट्रपति भण्डारीले जोशीले लेख्नुभएको र म्युजिक नेपालले प्रकाशन गरेको । क्रान्तिका लहर’ नामक सीडी पनि विमोचन गर्नुभयो । क्रान्तिका लहरमा विभिन्न ख्याति प्राप्त गायककार तथा सङ्गीतकारको स्वर र सङ्गीत रहेको छ ।