ताप्लेजुङ दोभान बजारमा भीषण आगलागी ४९ घर पूर्ण रूपमा जलेर नष्ट
फागुन १९, काठमाडौं । ताप्लेजुङको दोभान बजारमा मंगलबार बिहान भीषण आगलागी भएको छ । सदरमुकाम फुङ्लिङपछि जिल्लाकै दोस्रो ठूलो बजारका रूपमा रहेको मेरिङ्देन गाउँपालिका–३ खाम्लुङको दोभान बजारका ४९ घर पूर्ण रूपमा जलेर नष्ट भएका छन् । दोभान बाजारमा रहेका ३३ घरधनीका ४९ घर जलेर नष्ट भएको जिल्ला प्रहरी कार्यालय ताप्लेजुङका प्रमुख प्रहरी नायव उपरीक्षक बालनरसिंह राणाले बताए । ४९ घरमा डेरा गरी बस्ने २२ परिवार पनि विस्थापित बनेका छन् ।
आगलागी नियन्त्रणका लागी फुङ्लिङ नगरपालिकाको बारुणयन्त्र, दमकल, एक्साभेटरसहित उपकरण प्रयोग गरिएको थियो । नेपाल प्रहरी, सशस्त्र प्रहरी, नेपाली सेना र स्थानीयसहितको जनशक्ति आगो नियन्त्रणमा जुटेको राणाले बताए । दुई नदीको बीचमा रहे पनि पानीको प्रयोग गर्न स्थानीय सरकार असफल भएको छ । एकातर्फबाट तमोर नदी र अर्कातर्फ मैवाखोला बगेको छ । तर, दुई खोलाको बीचमा रहे पनि पानीको सदुपयोग गर्न गाउँपालिका असक्षम बनेको छ ।
तत्काललाई आगलागी नियन्त्रण भए पनि पुनः फैलन सक्ने अवस्था रहेकाले प्रहरी, सशस्त्र प्रहरी, नेपाली सेना, स्थानीय जनप्रतिनिधि, सर्वसाधारणलगायतका जनशक्ति आगो निभाउन खटिरहेको निमित्त प्रमुख जिल्ला अधिकारी गायत्रा अधिकारी खड्काले जानकारी दिइन् । आगो दोभान बजारनजिक खाम्लुङको साक्फारा भीर क्षेत्रमा पनि प्रवेश गरेकाले थप क्षतिको सम्भावना भएको प्रहरीले जनाएको छ । बजारका बाँकी रहेका घर तथा पसलसम्म फैलिन नदिने गरी आगो निभाउने कार्य भइरहे पनि जंगल क्षेत्रमा पसेको आगो भने नियन्त्रणबाहिर छ ।
ताप्लेजुङका स्थानीय सरकारसँग आगलागीसम्बन्धी वास्तविक योजना नहुँदा आगो तत्काल नियन्त्रणमा आउन नसक्दा धेरै क्षति हुने गरेको छ । बर्सेनि आगोको लपेटामा परेर सयौँ परिवार घरबारविहीन बनेका छन् भने करोडौँबराबरको क्षति बेहोर्नुपरेको छ । सदरमुकाम फुङलिङ बजारमा बर्सेनि आगलागी हुने गरेको छ । तर, एक मात्र बारुणयन्त्र वेलैमा घटनास्थलमा नपुग्दा ठूलो क्षति हुने गरेको छ । https://fb.watch/3_X_9pMUcq/