असोज ३, काठमाडौं । कमेडी च्याम्पियन–२ को उपाधि ताप्लेजुङका भरतमणि पौडेलले जितेका छन् । कान्तिपुर टेलिभिजनबाट प्रसारित हुने चर्चित रियालिटी शोको शनिबार भएको फाइनलमा विक्की अग्रवाल र सन्तोष थापालाई पछि पार्दै पौडेलले उपाधि जितेका हुन् । पूर्वसञ्चारमन्त्री गोकुलप्रसाद बाँस्कोटा, पूर्व युवराज पारस शाह, घरबेटीजस्ता प्रस्तुति दिएर निकै चर्चामा आएका पौडेलले उपाधिसँगै कार र २५ लाख नगदसमेत पाएका छन् । यस्तै भारत सिक्किमका विक्की अग्रवाल दोस्रो भए । उनले पुरस्कारमा टिभिएस अपाचे बाइक पाएका छन् । भरतमणिजस्तै विक्की पनि अनुभवी कलाकार हुन्। उनी सिक्किमका स्टेजहरूमा यसअघि नै लोकप्रिय छन्। कमेडी च्याम्पियन नबने पनि विक्कीले धेरैको मन जितेर फर्केका छन्। देशको सीमा नाघेर आएका विक्की नेपाल र सिक्किमलाई जोड्ने प्रिय कलाकार बनिसकेका छन्। त्यस्तै गोरखाका सन्तोष थापा तेस्रो भएका छन्। उनले टिभिएस स्कुटी पुरस्कार पाए । टप-३ सम्म सन्तोषले प्रहरी, डन, पानीको जार बोक्ने मानिस, म्यान पावर कम्पनीवालासम्मको भूमिकामा दर्शकलाई हसाए। सामाजिक सन्दर्भका व्यंग्य जोडे। नेपाली टिचर उनको सर्वाधिक मन पराइएको प्रस्तुति रह्यो। फाइनलमा विजेताहरूलाई पुरस्कृत गर्न मदनकृष्ण श्रेष्ठ र हरिवंश आचार्य कार्यक्रमका अतिथि बनेका थिए।