राष्ट्रगुरु योगी नरहरिनाथको १०८ औं जन्मजयन्ती आयोजित
१९ फागुन, काठमाडौँ ।
विश्व हिन्दू परिषद्, नेपालले राष्ट्रगुरु योगी नरहरिनाथको जन्मजयन्ती आयोजना गरेको छ ।
कार्यक्रममा प्राज्ञिक विद्यार्थी परिषद्, नेपालका राष्ट्रिय संगठन सचिव नारायण प्रसाद ढकालले पूज्य योगी नरहरिनाथको जीवन र कार्यबारे विषय राख्नु भएको थियो ।
नेपालमा हिन्दुत्व भाव जागरण, समाजमा आध्यात्मिक विचार, शैक्षिक चेतना जागरण जस्ता पुनीत कार्य पूज्य योगीजीले गर्नुभएको उहाँले स्मरण गर्नुभयो । देशका विभिन्न स्थानमा कोटिहोम आयोजना गर्दै समाजलाई यज्ञमय जीवनका लागि प्रेरित गर्ने राष्ट्रगुरुको जीवन सबै नेपालीले अध्ययन गरेर त्यसबाट हाम्रो सुन्दर स्वदेशलाई झनै सुन्दर, सुसंस्कृत बनाउनतर्फ लाग्नुपर्ने प्रेरणा लिनुपर्नेमा उहाँले जोड़ दिनुभयो ।
पूज्य योगीजीसँग प्रत्यक्ष दर्शन एवं सत्संगलाभ गर्नुभएका कार्यक्रमका मुख्य अतिथि बल बहादुर कार्कीले आफूलाई आध्यात्मिक पथमा हिँड्न उहाँले नै प्रेरित गर्नुभएको बताउनु भयो । योगीजीका असंख्य कृतिहरू दाङको चौघेरामा अप्रकाशित रूपमा रहेको तथा हाल लगभग ६० जति ग्रन्थ प्रकाशित रूपमा रहेको उहाँले उल्लेख गर्नुभयो । संस्कृत शिक्षाका निम्ति उहाँको सद्प्रयासबारे स्मरण गर्दै उहाँले योगीजी झै संस्कृत र संस्कृतिको उत्थान र राष्ट्रको हित चिन्तनमा लाग्नु हाम्रा निम्ति पनि श्रेयस्कर हुने विचार उहाँले व्यक्त गर्नुभयो ।
नेपालको इतिहास खोज्ने र छुटेका कड़ी जोड्ने कार्यमा उहाँको अतुलनीय योगदान रहेको उहाँले उल्लेख गर्नुभयो ।
जाउलाखेलस्थित हिन्दू राष्ट्र स्वाभिमान जागरण अभियानको कार्यलयमा आयोजित कार्यक्रममा समाजका गण्यमान्य व्यक्तिहरूको उपस्थिति रहेको थियो ।