१९ बैशाख, काठमाडौँ ।
फेरि एक पटक बलिउड अभिनेता अजय देवगनले चलचित्र ‘रनवे ३४’ बाट आफ्नो निर्देशकीय क्षमता प्रस्तुत गरेका छन् । उक्त चलचित्रको कथा सन् २०१५ मा दोहाबाट कोचिन आउँदै गरेको जेट एयरवेजको विमानसँग भएको सत्य घटनामा आधारित छ ।
एउटा अनुभवी पाइलट विक्रान्त खन्ना (अजय देवगन) र उनका सहपाइलट तान्या (रकुलप्रित सिंह)ले खराब मौसमको अवस्था, बाहिरको कमजोर दृश्य, इन्धनको अभाव र आतङ्कित यात्रुको बीचमा कसरी प्लेनलाई सुरक्षित अवतरण गर्छन् भन्ने चलचित्रमा देखाइएको छ । चलचित्रमा प्लेनमा बसेका यात्रुहरू कसैलाई चोट लाग्न नदिकन विक्रान्तले सकुशल अवतरण गराउँछन् ।
यस चलचित्रमा विक्रान्तलाई धेरै नै होसियार पाइलटका रूपमा देखाउन खोजिएको छ । आफूमा फोटोग्राफी दिमाग पाएकोमा गर्व गर्ने र प्लेनभित्र हुने हरेक कुरा र प्लेनमा भएका हरेक कुरा सम्झिरहने क्षमता भएको विक्रान्तको भूमिकालाई अजय देवगनले राम्रो अभिनय प्रस्तुत गरेका छन् ।
विक्रान्तलाई चकित पार्ने जति कठिनाइ आए पनि उनी नआत्तिकन आफ्नो लक्ष्यमा सफल हुन्छन् । विक्रान्तको साहसी कार्यको सबैले प्रशंसा गर्नुपर्छ र गर्छन् । तर यसो हुँदाहुँदै पनि उनी प्रश्नको घेरामा पर्छन् ।
यीबाहेक चलचित्रमा वुमन इरानी, आकाङ्क्षा सिंह, अङ्गिरा धर र युट्युबर क्यारी मिनातीको पनि अभिनय छ । समग्रमा ‘रनवे ३४’ अजय देवगनको उत्कृष्ट चलचित्रमध्ये एक हो भन्दा फरक पर्दैन । चलचित्रमा थोरै झट्का छ, थोरै इन्धन कम छ तैपनि निर्देशकले चलचित्रलाई सजिलै दर्शकसामु अवतरण गरेका छन् ।