२२ बैशाख काठमाडौँ । ‘मिस युनिभर्स नेपाल २०२२’ को आवेदन खुल्ला भएको छ । सोही आवेदन दर्ता मे ५ देखि दुई महिनासम्म खुला हुने भएको छ । बिहीबार आयोजित पत्रकार सम्मेलनमा तेस्रो संस्करणको आयोजनाबारे जानकारी दिदै प्रतिस्पर्धीको मापदण्डलाई खुकुलो बनाउँदै नियम पनि सार्वजनिक गरिएको छ । साथै आगामी संस्करणमा उचाइ र तौलको मापदण्ड तोकिएको छैन । समलैंगिक महिलाले पनि भाग लिन पाउने भएका छन् भने आप्रवासीलाई पनि मौका दिइएको छ । प्रतियोगिताकी नेपाल निर्देशक नग्मा श्रेष्ठका अनुसार प्रतिस्पर्धालाई समावेशी बनाउन नियमहरुलाई खुकुलो बनाइएको हो । प्रतियोगितामा १८ देखि २८ वर्षसम्मका युवतीहरूले सहभागिता जनाउन सक्नेछन् । आयोजकका अनुसार सहभागीका लागि एप्लिकेसनमार्फत आवेदन दिन सकिन्छ । प्रेसमिटमा मिस युनिभर्स नेपालको एप पनि लञ्च गरिएको छ । एन्ड्रोइड र एप्पल स्टोरबाट प्रतियोगिताको एप डाउनलोड गरेर आवेदन दर्ता गर्न सकिने भएको छ । जुलाई ८ मा आवेदकमध्येबाट योग्य प्रतिस्पर्धी छनोट गरेर क्वार्टरफाइनलका प्रतिस्पर्धी घोषणा हुने छन् । अगस्ट २ मा सेमीफाइनलका प्रतिस्पर्धी तय हुनेछन् । अगस्ट ८ देखि बन्द सत्र सुरु हुनेछ । अगस्ट ११ मा अन्तिम प्रतिस्पर्धा हुने भएको छ । विजेताले उपाधिका साथमा १० लाख नगद प्राप्त गर्नेछन् ।