एक्लै उडान भर्ने विश्वकै कान्छो पाइलट
भाद्र ९, काठमाडौँ ।
१७ वर्षीय बेलायती किशोर माक रुथरफोर्ड विश्वमै एक्लै उडान भर्ने पाइटलको नयाँ कीर्तिमान कायम गरेका छन् । हिजो उनले बुल्गेरियामा उडान भरेको विमान अवतरण गरेपछि उनी सानो हवाईजहाजमा एक्लै विश्व परिक्रमा गर्ने कान्छो पाइलट बनेका हुन् ।
पाँच महिनाअघि यात्रा शुरु गरेका म्याकले ५२ देशको परिक्रमा पूरा गरे । बेलायती आमाबुबाबाट जन्मेर बेल्जियममा हुर्केका रुथरफोर्डले हवाई यात्राका क्रममा सुडानमा बालुवाको आँधीबेहरी बेहोर्नुका साथै एक रात प्रशान्त महासागरस्थित मानवविहीन टापुमा रात समेत बिताएका थिए ।
यात्राको क्रममा रुथरफोर्डले युरोप, एशिया, अफ्रिका, र अमेरिका महादेश साथै दुईवटा महासागर पार गरे। यात्राको क्रममा उनले दुबईको प्रचण्ड गर्मी र भारतको आकस्मिक विमानस्थल बन्दको सामना गरे । उनले सीएनएनसँगको अन्तर्वार्तामा केन्याको राष्ट्रिय निकुञ्ज र न्यूयोर्कमाथि यात्रा गर्दा सुन्दर दृश्यहरू देखिएको बताए । सन् २०२० को सेप्टेम्बरमा उनले १५ वर्षको उमेरमा विमान चालक अनुमति पत्र प्राप्त गरेका थिए। उनका पिता साम व्यावसायिक पानीजहाज चालक हो भने आमा ब्रिटिश निजी विमानचालिका हुन् ।
यसअघि सबैभन्दा कम उमेरमा हवाईजहाजमा विश्व परिक्रमा गर्ने ब्रिटिश ट्राभिस लुड्लो थिए जो गत वर्ष यात्रा पूरा गर्दा १८ वर्षको थिए । उनको स्वागत र उपलब्धिमा खुसियाली मनाउन मानिसहरूको ठूलो भीड एयरपोर्टमा जम्मा भएको थियो। म्याकले आफ्नो उपलब्धिले युवाहरूलाई आफ्ना सपनाहरू पछ्याउन प्रेरित गर्ने आशा व्यक्त गरे ।