भदौ १४, काठमाडौं । सरकारले काठमाडौं उपत्यकामा रहेका सम्पदा क्षेत्रको भ्रमणलाई सहज बनाउन ‘होप अन हप अफ’ बस सञ्चालनको तयारी थालेको छ । पर्यटनमन्त्री जीवनराम श्रेष्ठले यस विषयमा मंगलबार सरोकारवालासँग छलफल गरेका छन् । मन्त्रालयमा भएको छलफलमा बस व्यवसायी, विज्ञ तथा ट्राफिक प्रहरी लगायतको उपस्थिति थियो । काठमाडौंका साँस्कृतिक सम्पदा घुम्न आउने विदेशी तथा स्वदेशी पर्यटकलाई सम्पदा क्षेत्र अवलोकनमा सहज बनाउन ‘होप अन हप अफ’ बस संचालन गर्न लागिएको हो । पर्यटकलाई सम्पदा क्षेत्रको अवलोकन गर्न सार्वजनिक सवारी सहज नहुँदा हैरानी खेप्नुपरेको गुनासो आउने गरेको छ । ‘होप अन हप अफ’ बस संचालन भएपछि पर्यटकले केही घण्टामै मुख्य पर्यटकीय क्षेत्रको अवलोकन गर्न सक्नेछन् । ‘होप अन हप अफ’ का लागि अन्तर्राष्ट्रिय मापदण्ड अनुरुपका बस सञ्चालन गर्न सरोकारवालाको सुझाव छ । पहिलो चरणमा साझा यातायातका विजुली बसलाई ‘होप अन हप अफ’ का लागि प्रयोग गर्ने तयारी गरिएको छ । साझा यातायातका सदस्य भुषण तुलाधरले २ महिनाभित्र बस सञ्चालन गर्ने तयारी भइरहेको बताए । अपाङ्गता तथा जेष्ठ नागरिकमैत्री बसमा पर्यटक पथप्रदर्शक समेत हुनेछन् । २७ किलोमिटरको मुख्य सम्पदा यात्रा गर्न साढे २ घण्टा लाग्नेछ । ५ वटा बस ३०–३० मिनेटमा छुट्ने गरी तयारी गरिएको तुलाधरले बताए । मन्त्री श्रेष्ठले पर्यटन पुनरुत्थान कार्ययोजनामा यो योजनालाई प्राथमिकता दिएको बताए । सरकारले पर्यटन क्षेत्रको विकासका लागि साँस्कृतिक सम्पदा संरक्षण गर्दै अर्थतन्त्रमा टेवा पुग्ने गरी काम गरिरहेको मन्त्री श्रेष्ठले बताए । पर्यटकका लागि नेपाल बाह्रै महिना घुम्नयोग्य छ भन्ने सन्देश अन्तर्राष्ट्रिय बजारमा प्रवाह गर्ने योजना बनाइएको उनको भनाइ छ ।