काठमाडौं । लोक तथा दोहोरी गायिका अमृता श्रीपाल आफूलाई धन थापाले यातना दिएको भन्दै राष्ट्रिय लोक तथा दोहोरी गीत प्रतिष्ठान, जापान शाखासँग सुरक्षाको माग गरेकी छन् ।

गायिका श्रीपालले राष्ट्रिय लोक तथा दोहोरी गीत प्रतिष्ठान, जापान शाखामा एक निवेदन लेख्दै आफूलाई थापाले यातना दिएको बताएकी हुन् । गत अगस्ट १३ मा जापानको ओसाका कोबे शहरस्थित धौलागिरि दोहोरी साँझमा सांगीतिक प्रस्तुतिका लागि स्पोन्सर गरेका बागलुङका थापाविरुद्ध गायिका अमृता श्रीपालले उजुरी दिएकी हुन् ।

कार्यक्रमका सहकर्मीसँग अनैतिक सम्बन्ध राखेको आरोप लगाउँने गरेको र आफू जापान प्रवेश गरेपछि हरेक कार्यक्रममा गाउँदा पाएको पारिश्रमिक थापालाई कमिसन दिनुपर्ने उनले बताएकी छन् । थापाले आफूलाई आउन जान यातायात खर्च समेत नदिने गरेको उनले निवेदनमा उल्लेख गरेकी छन् ।

उनले सो निवेदनमा आफूलाई उचित न्याय र सुरक्षाको प्रत्याभूति हुने वातावरण मिलाइदिन शाखालाई आग्रह गरेकी छन् । श्रीपालले आफुसगँ अझै २ महिनाको जापानको भिसा भएको र आफू कलाकार भएको हिसाबले अझै केही समय जापानमा बस्ने स्थिती सहज बनाइदिन राष्ट्रिय लोक तथा दोहोरी गीत प्रतिष्ठान, जापान शाखामा अपिल गरेकी छन् ।

मिति:-१२ सेप्टेम्बर, २०२२

श्रीमान् सूर्य खड्का ज्यू,

विषय:- न्याय तथा सुरक्षा सम्बन्धमा

उपरोक्त सम्बन्धमा म लोक तथा दोहोरी गायिका अमृता श्रीपाल १३ अगस्त २०२२ मा नेपाल देखि जापानको ओसाका कोबे सहरमा रहेको धौलागिरि दोहोरी साँझमा साङ्गीतिक प्रस्तुति दिन धन थापा (बाग्लुङ) को स्पोन्सरमा जापान आएको जानकारीका लागि अनुरोध छ । यहाँ आए देखि नै थापाले विभिन्न किसिमका टर्चर दिने गरेका थिए ।

जापान प्रवेश पछि हरेक कार्यक्रममा जाँदा थापालाई उल्टो कमिसन दिनु पर्ने तर आउन जान यातायात लगायत केही व्यवस्था  नगर्ने जो सँग कार्यक्रममा गयो उसै सँग अनैतिक सम्बन्ध राखेको ट्याग लगाउँदै अति धेरै नै भौतिक यातना दिने गरेको जानकारी गराउँछु ।

मेरो अझै लगभग २ महिनाको भिसा बाँकी रहेको र आफू कलाकार रहेको हुँदा थप केही समय जापानमा बस्ने र तय भएका साङ्गीतिक कार्यक्रममा प्रस्तुति दिने माहौल सृजना गरिदिन हुन् प्रतिष्ठान, जापान शाखा समक्ष हार्दिक अनुरोध गर्दछु । निज थापाले मलाइ जापानमा र मेरो नेपाल (म्याग्दी) मा रहेको परिवारलाई समेत मार्ने धम्की दिने गरेको हुँदा मलाइ मानसिक पिडा, सामाजिक इज्जत, साङ्गीतिक करियरमा असर पर्न साथै चरित्र हत्याको पीडाले अति धेरै पीडित बनेकी छु ।

उसको स्वार्थ पुरा नहुँदा हिजो ११ सेप्टेम्बरमा पनि भौतिक रूपमा थापाले ममाथि आक्रमण गरे पछि मैले आफ्नो ज्यान जोगाउँदै ओसाकामा एक घरमा शरण लिई लुकीछिपी बसिरहेकी छु । मलाइ मानसिक, भौतिक तथा शारीरिक रूपमा धेरै पिडा परेको जानकारी गराउँदै मलाइ उचित न्याय र सुरक्षाको प्रत्याभूति दिलाइदिन हुन् सविनय अनुरोध गर्दछु ।