नेपालमा भारतीय र अमेरिकी पर्यटकको आगमन उत्साहजनक
पुष १७, काठमाडौं । नेपालमा भारतीय र अमेरिकीको पर्यटकको आगमन उत्साहजनक देखिएको छ । सन् २०२३ मा नेपालमा भारतबाट मात्र ३ लाख र अमेरिकाबाट १ लाख भन्दा धेरै पर्यटक आएका छन् ।
नेपालले सन् २०२३ को एक वर्षको अवधिमा १० लाख १५ हजार पर्यटकलाई स्वागत गर्न सफल भएको छ । नेपाल पर्यटन बोर्डका अनुसार जनवरी २०२३ देखि डिसेम्बर २०२३ को एक वर्षको अवधिमा १० लाख १४ हजार ८७६ जना पर्यटक नेपाल भ्रमणमा आएका हुन् । यस वर्ष भारतीय र अमेरिकी पर्यटकको आगमन उत्साहजनक देखिएको छ । यो आगमन सन् २०२२ को तुलनामा ४ लाख ७२८ जना बढी हो । सन् २०२२ मा ६ लाख १४ हजार १४८ जना पर्यटक नेपाल भ्रमणमा आएका थिए ।
चीनले नाकाहरु खुला गर्दै जाँदा चिनियाँ पर्यटकहरु समेत बढ्न थालेको र यसले समग्र पर्यटक आगमनमा उत्साहजनक वृद्धि देखिएको छ । यस वर्ष अमेरिकी र बंगलादेशी पर्यटकको आगमन पनि केही बढेको छ । भारतीय पर्यटकको आगमनले उत्साह थपिएको छ ।
वर्षको अन्तिमतिर चीनले सबै नाकाहरु खोल्दै जाँदा सन् २०२४ मा भारतीय र चिनियाँ पर्यटकबीच आगमनमै प्रतिस्पर्धा हुने अपेक्षा व्यवसायीहरुले गरेका छन् ।
नेपाल पर्यटन बोर्डको तथ्यांक अनुसार सन् २०२३ मा भारतबाट मात्र ३ लाख १९ हजार ९३६ जना पर्यटक नेपाल आएका छन् । सन् २०१९ मा २ लाख ५४ हजार १५० जना भारतीय पर्यटक नोपल आएका थिए । नेपालले हवाईमार्गबाट आउने भारतीय नागरिकलाई मात्र पर्यटक गणना गर्दै आएको छ ।
सन् २०२३ मा अमेरिकाबाट १ लाख ३५७ जना पर्यटक नेपाल आएका छन् । सन् २०१९ मा अमेरिकाबाट ९३ हजार २४१ जना पर्यटक आएका थिए । यस वर्ष चीनबाट ६० हजार ८७८ जना मात्र पर्यटक आएका छन् । सन् २०१९ मा चिनियाँ पर्यटकको आगमन १ लाख ६९ हजार ५४३ रहेको थियो ।