२३ असार, काठमाडौं । नेपाल अन्तर्राष्ट्रिय कृष्णभावनामृत संघ (इस्कोन नेपाल) ले राष्ट्रपति रामचन्द्र पौडेलको प्रमुख आतिथ्यमा ३९ औँ ऐतिहासिक श्री जगन्नाथ रथयात्रा महोत्सवको आयोजना गरेको छ । राजधानीको कमलादीमा एक विशेष समारोहबिच आज आइतवार बिहान राष्ट्रपति पौडेलले सो रथयात्रा महोत्सवको शुभारम्भ गर्नुभयो ।

समारोहमा  राष्ट्रपति पौडेलले भगवान् जगन्नाथको पूजा अर्चना र आरती गर्नुभएको थियो । उक्त रथयात्रा महोत्सव कमलादी–घण्टाघर दरबारमार्ग पुतलीसडक प्रदर्शनी मार्ग भद्रकाली एन. ए. सी न्यूरोड वसन्तपुर हुँदै टुँडिखेलमा समापन हुनेछ।

विष्णुका पूर्ण कला रूप श्रीकृष्णलाई संस्कृतमा जगन्नाथ नामले पुकारिन्छ । धार्मिक मान्यता अनुसार एक पटक बहिनी सुभद्राले आफ्ना भाइ कृष्ण र बलरामलाई सहर हेर्ने इच्छा व्यक्त गरे । त्यसपछि दुवै दाजुभाइले बहिनी सुभद्राको लागि तयार पारेको भव्य रथ ल्याइ त्यसमा सवार तीनै जना सहर घुम्न निस्किए । बाटोमा तीनै जना गुण्डिचामा काकीको घरमा पनि गए र त्यहाँ ७ दिन बसे । सहरको भ्रमण सकेर पुरी फर्किए । त्यस बेलादेखि हरेक वर्ष तीनै दाजुभाइ र दिदीबहिनी रथमा चढेर सहर घुम्न र काकीको घर गुण्डिचा मन्दिर जान्छन् । यी मध्ये बलरामको रथ अगाडि, बहिनी सुभद्राको रथ बिचमा र जगन्नाथको रथ पछाडि रहने गर्दछ ।

नेपालमा सन् १९७७ देखि यो यात्रा गर्न थालिएको इस्कोनका सचिव रुपेश्वर गौरवदासले जानकारी दिनुभयो । आजका दिन नेपाललगायत एक सय ६५ देशमा रथ यात्रा आयोजना गरिएको उहाँले बताउनुभयो ।