२७ असार, काठमाडौं । नेदरल्यान्ड्सलाई हराउँदै इंग्ल्यान्ड यूएफा युरो कप २०२४ को फाइनलमा प्रवेश गरेको छ । गए राति सम्पन्न भएको खेलमा नेदरल्यान्ड्सलाई २–१ को अन्तरले हराएर इंग्ल्यान्ड फाइलनमा प्रवेश गरेको हो ।
फाइलनमा पुग्न इंल्यान्डले १–० ले पछि परेको अवस्थाबाट पुनरागमन गर्यो ।
अघिल्लो सिजन फाइनलमा इटालीसँग पेनाल्टी सुटआउटमा पराजित इंग्ल्यान्ड लगातार दोस्रो पटक फाइनल सम्म पुगेको हो । अब इंग्ल्यान्डले उपाधिको लागि स्पेनसँग खेल्नेछ । सिंगल इडुना पार्कमा ६० हजार दर्शकबीच इंल्यान्डलाई फाइनल सम्म पुर्याउन ह्यारी केन र ओली वाटकिङ्सले गोल गरे । जाभी सिमोन्सले नेदरल्यान्ड्सलाई सुरुवाती अग्रता दिलाए पनि डच टोलीले त्यसलाई जोगाउन सकेन ।
सातौं मिनेटमै सिमोन्सले बक्स बाहिरबाट गरेको प्रहार गोलमा परिणत भएको थियो । सिमोन्सको प्रहार इंग्लिस गोलकिपर जोर्डन पिकफोर्डले रोक्ने कुनै अवसर नै पाएनन् । १७ औं मिनेटमा इंग्ल्यान्डले बराबरी गोल फर्कायो । नेदरल्यान्ड्सका डिफेन्डर डेन्जल डुम्फ्रिजले बक्सभित्र फाउल गरेपछि इंल्यान्डका ह्यारी केनले पेनाल्टीमा गोल गरेका हुन् ।
खेलको ३२ औं मिनेटमा फिल फोडेनको प्रहार बारमा लाग्दै बाहिरियो । नियमित समयको अन्तिम मिनेटमा ओली वाटकिङ्सले गोल गर्दै इंग्ल्यान्डलाई फाइनलसम्म पुर्याए । वाटकिङ्सले कोल पाल्मरले मिलाएको पासमा निर्णायक गोल गरेका थिए । क्वार्टरफाइनलमा नेदरल्यान्ड्सले टर्कीलाई २–१ तथा इंग्ल्यान्डले स्विट्जरल्यान्डलाई पेनाल्टी सुटआउटमा पराजित गरेको थियो ।
अब इंग्ल्यान्डले आइतवार बर्लिनमा हुने युरो–२०२४ को फाइनलमा स्पेनसँग प्रतिस्पर्धा गर्ने छ। स्पेन फ्रान्सलाई हराएर फाइनल प्रवेश गरेको थियो।