४ असार, काठमाडौं । सहरलाई स्वस्थ र स्मार्ट बनाउनका लागि साइकल जात्रा  ‘कोरा २०२४’ आयोजना हुने भएको छ । वातावरणविद् भुषण तुलाधारका अनुसार उपत्यकाको प्रदूषण अधिकांश सवारी सधानको प्रयोगले हुँदा साइकल संस्कृति प्रवद्र्धन गर्नसके प्रदूषण घट्ने र सहर स्वस्थ हुने उद्देश्यले साइकल जात्रा आयोजना गर्न लागिएको हो । 

करिब चार हजार साइकल यात्री सहभागी हुने  ‘कोरा २०२४’ को १४ औँ संस्करण हो । 

साउन ५ गते देशकै ठुलो साइकल जात्रा गर्न लागेको आयोजकले जनाएको छ । 

सन् २०११ मा ३५ जनाबाट सुरु भएको काठमाडौँको कोरा साइकल यात्रा हरेक वर्ष पाटनको मंगलबजारबाट सुरु भएर काठमाडौँ उपत्यकाको एक फन्को लगाएर पाटनको नागबाहालमा अन्त हुने गर्छ । साइकल यात्रीहरूले यस क्रममा आफ्नो इच्छा अनुसार ५० किलोमिटर, ७५ किलोमिटर, १०० किलोमिटर वा १४० किलोमिटरको यात्रा तय गर्न पाउनेछन् । 

हरेक वर्ष जुलाई महिनाको तेस्रो शनिवार आयोजना हुने कोरामा यो वर्षको काठमाडौँ कोरामा ललितपुर महानगरपालिका पनि सह–आयोजकको रूपमा सहभागी भएको छ । ललितपुर महानगरपालिकाका प्रमुख चिरिबाबु महर्जनले ललितपुरलाई स्मार्ट सिटी बनाउने र यसको लागि नगरवासीहरुले साइकल चढ्न सक्ने वातावरण बनाइ साइकल संस्कृतिको विकास गर्न आवश्यक रहेको बताउनुभयो ।

साइकल संस्कृतिको विकास गर्न महिला, बालबालिकालगायत समाजका सबै वर्गलाई समेत समावेश गर्न सहभागिता बढाउन विशेष प्रयास गर्दै आइरहेको छ । 

आयोजनाको मूल उद्देश्य देशभरि नै साइकलिस्ट समुदायहरू विकास गरी साइकल संस्कृतिको प्रवर्धन गर्नु रहेको छ ।