साउन १०, काठमाडौं । काठमाडौंबाट बुधवार बिहान ११ः११ मा पोखराका लागि उडेको ९ एन–एएमई सीआरजे विमान त्रिभुवन अन्तर्राष्ट्रिय विमानस्थलमा दुर्घटनाग्रस्त भयो । अन्तर्राष्ट्रिय विमानस्थल परिसरभित्र भएको घटनामा परेर १८ जनाको मृत्यु भयो ।

दुर्घटना लगत्तै पाइलट मनिष शाक्यको घाइते अवस्थामा उद्धार भएको थियो । उद्धार लगत्तै पाइलट शाक्यको केएमसी अस्पतालमा भर्ना गरि उपचार भइरहेको छ । शाक्यको सिनामंगलस्थित केएमसी अस्पतालको न्यूरो आईसीयूमा उपचार भइरहेको छ ।

क्याप्टेन शाक्यले डाक्टर र परिवारका सदस्यसँग सामान्य कुराकानी गरेका गरेका समाचार आइरहेका छन् ।

बिहीवार बिहान केएमसीकी मेडिकल डाइरेक्टर डा मिना थापासँग क्याप्टेन शाक्यले कुरा गर्दै जहाज १०० फिटजति माथि पुगेपछि जहाज माथि लैजान नसकेको बताएका छन् । क्याप्टेन शाक्यले जहाज कन्ट्रोल गर्न नसकिए पछि तल तल खस्न थालेको बताएका छन् ।

त्यसपछि आफूलाई केहीले थिचेको जस्तो महशुष भएको र पछि उद्धारको क्रममा तानेको थाहा भएको समेत बताएका छन् ।

शरीरका विभिन्न भागमा चोटपटक लागेका पाइलट शाक्यको सिनामंगलस्थित के.एम.सी.मा उपचार भईरहेको छ । सिटीस्यानको रिपोर्टमा क्याप्टेन शाक्यको ढाडको हड्डी भाँचिएको देखिएको छ । तर शरीरको अन्य भागमा ठूलो चोट देखिएको छैन । उनी खतरामुक्त छन् र स्वास्थ्यमा क्रमिक सुधार हुँदै छ ।