२१ साउन, काठमाडौं । डोटीबाट पूजा सामग्रीसहित सरकारी टोली बाजुराको बडीमालिकाका लागि प्रस्थान गरेको छ ।  बाजुरामा अवस्थित बडीमालिका भगवतीको पूजाआजा गर्न डोटीबाट हरेक वर्षझैं यसवर्ष पनि जनैपूर्णिमाको दिन लाग्ने मेलाका लागि फूलप्रसादसहित सरकारी टोलीलाई विदाइ गरिएको हो । 

बाजुरामा रहेको बडीमालिकामा श्रावण शुक्ल पूर्णिमाका दिन सम्पन्न हुने विशेष मेलामा डोटीबाट पूजा सामग्रीका साथ ‘पेटारो’ पठाउने गरिन्छ । सरकारी कर्मचारीहरूको एक टोलीले नै उक्त पेटारो लैजाने गर्दछन् । यो चलन वर्षौंदेखि चलिरहेको छ।

‘जिल्ला प्रशासन कार्यालय डोटीबाट निकालिएको मालिका रथयात्रालाई शैलेश्वरी मन्दिरमा तान्त्रीक विधिले पूजा गरी विशेष मन्त्रले बाँधी पेटारोका साथ सरकारी टोलीलाई विदाइ गरिन्छ । 

भगवतीका सात बहिनीमध्येमा कान्छी बहिनी मानिने बडीमालिका भगवतीको रथयात्रालाई जिल्ला प्रशासनमा नेपाली सेना,नेपाल प्रहरी र सशस्त्र प्रहरीको एक टुकडीले सलामीसहित टोलीलाई विदाइ गर्ने चलन रहेको छ ।

सरकारी टोलीलाई गन्तव्यसम्म पुग्नका लागि अछाम,बाजुरा जिल्लाको सुरक्षा समितिसँग समन्वय भएको र विशेष सुरक्षा व्यवस्था समेत मिलाइएको प्रशासन कार्यालयले जनाएको छ । धार्मिक तथा प्राकृतिक महत्वको पर्यटकीय क्षेत्र बडीमालिकालाई ठूलो शक्तिपीठका रुपमा हेर्ने गरिन्छ ।