३२ साउन, काठमाडौं ।  थाइल्याण्डको नयाँ प्रधानमन्त्रीको रूपमा ३७ वर्षीय पेतोङत्रान सिनावात्रा निर्वाचित हुनुभएको छ ।   थाइल्याण्डको संसदले आज शुक्रवार उहाँलाई प्रधानमन्त्रीमा निर्वाचित गरेको हो।

उहाँ अर्बपति एवम् पूर्व प्रधानमन्त्री थाक्सिन सिनावात्राकी छोरी हुनुहुन्छ । 

सिनावात्रा परिवारबाट प्रधानमन्त्री बन्ने पेतोङत्रान तेस्रो व्यक्ति हुनुहुन्छ । योभन्दा अघि उहाँका बुवा थाक्सिन र फुपु यिंगलक सिनावात्रा प्रधानन्त्री हुनुभएको थियो ।

त्यहाँको संवैधानिक अदालतले ३० साउनमा मात्र प्रधानमन्त्री स्रेथा थबिसिनलाई बर्खास्त गरेको थियो । त्यसपछि सत्तारुढ फेउ थाइ दलले सिनावात्रालाई प्रधानमन्त्रीको उम्मेदवारका रुपमा अगाडि सार्‍यो ।

थाइल्याण्डको संवैधानिक राजतन्त्रको इतिहासमा पेतोङत्रान सबभन्दा कम उमेरकी थाइ प्रधानमन्त्री हुनुभएको छ । राज्यको संवैधानिक अदालतले निवर्तमान प्रधानमन्त्री श्रेता थाभिसिनलाई फौजदारी अभियोग लागेका व्यक्तिलाई मन्त्री नियुक्त गरेको भनी अदालतमा दायर मुद्दामाथि सुनुवाइपछि दोषी ठहर गर्दै पदमुक्त गरिएको थियो । पेटोङ्टार्न थाइल्याण्डको दोस्रो महिला प्रधानमन्त्री बन्नुभएको छ ।

सेना, राजावादी दलहरू र टेलिकम टाइकून तथा कुनै समय म्यानचेस्टर सिटीका मालिकसमेत बनेका पूर्वप्रधानमन्त्री थाक्सिनसँग जोडिएका पपुलिस्ट पार्टीहरूबिच लामो समयदेखिको तनावपछि निवर्तमान प्रधानमन्त्री स्रेथाको बहिर्गमन भएको थियो ।  संसद्को तेस्रो ठुलो दल भुमजैथाईले शुक्रवारको मतदानमा फेउ थाईका उम्मेदवारलाई समर्थन गर्न सहमत भएको जनाएको छ ।

सन् २०२२ को अन्त्यमा राजनीतिमा प्रवेश गर्नुभएको पेतोङत्रानले होटेल क्षेत्रको व्यावसाय हेर्दै  आउनुभएको छ । उहाँले कहिल्यै निर्वाचित पद भने सम्हाल्नु भएको थिएन । 

गत वर्षको आम चुनावको दौडान उहाँ चुनावी अभियानमा निरन्तर  सहभागी भएपछि उहाँलाई प्रधानमन्त्रीको दावेदारका रुपमा हेरिएको थियो । रासस