एसईईको नतिजा ३/४ दिनभित्र आउने
साउन २२, काठमाडौं । राष्ट्रिय परीक्षा बोर्डले एसईईको नतिजा आगामी हप्ताभित्र सार्वजनिक गर्ने भएको छ ।
बोर्डका अध्यक्ष प्रा.डा. चन्द्रमणि पौडेलले बिहीबार राष्ट्रिय परीक्षा बोर्डमा एसईईको मूल्यांकन प्रगतिबारे छलफल गरेकोे जानकारी दिएका छन् । एसईईको मूल्यांकन प्रगतिबारे प्राविधिक सम्पादन मात्रै बाँकी रहेको अध्यक्ष पौडेलले बताएका छन् ।
परीक्षा नियन्त्रक रुद्र अधिकारीका अनुसार जिल्लाबाट प्राप्त भएका मूल्यांकन विवरण ‘इन्ट्री’को काम सकिएको र विद्यार्थीले प्राप्त गरेका अङ्कको आधारमा ग्रेडहरू मिलाउने लगायत प्राविधिक काम बाँकी रहेका छन् । उनले यो शुक्रवारसम्म एसईईको नतिजा निकाली सक्ने दावी गरेका छन् ।
निषेधाज्ञाका कारण गत २७ वैशाखमा एसइई परीक्षा स्थगित भएको थियो । कोरोना भाइरस संक्रमणको दोस्रो लहर तीव्र रुपमा फैलिएको कारणले गत जेठ १३ गतेदेखि तय भएको एसईईको परीक्षा हुन नसकेपछि जेठ १७ मा बसेको मन्त्रिपरिषद् बैठकले आन्तरिक मूल्याङ्कनबाट नतिजा प्रकाशन गर्ने निर्णय गरेको थियो ।
कक्षा १० को विद्यार्थी मूल्यांकन कार्यविधिले विद्यार्थीको निर्माणात्मक २० प्रतिशत (विद्यार्थीको हाजिरी, प्रस्तुति लगायतको विषय), निर्णयात्मक ५५ प्रतिशत (विद्यालयले लिएको त्रैमासिक परीक्षाको मूल्यांकन) र प्रयोगात्मकको लागि २५ प्रतिशत मूल्यांकन तोकेको छ ।
प्रयोगात्मक नभएका विषयहरुमा निर्माणात्मक २५ प्रतिशत र निर्णयात्मक ७५ प्रतिशत मूल्यांकन आधार तोकिएको छ ।