‘स्वर कोकिला’ लता मंगेशकरको निधन
भारतकी प्रख्यात गायिका लता मंगेशकरको ९२ वर्षको उमेरमा निधन भएको छ ।
गत जनवरीमा कोरोना पोजेटिभ देखिएपछि उनलाई मुम्बईको एक अस्पतालमा भर्ना गरिएको थियो । पछि उनलाई निमोनिया भयो । उनको अवस्था नाजुक भएपछि भेन्टिलेटरमा राखिएको थियो । उनको स्वास्थ्यमा सुधार आएपछि भेन्टिलेटर सपोर्ट पनि हटाइयो । तर फेब्रुअरी ५ मा उनको अवस्था बिग्रन थालेपछि उनलाई फेरि भेन्टिलेटरमा राखिएको थियो । अन्ततः फेब्रुअरी ६ मा ‘स्वार कोकिला’ ले अन्तिम सास फेरिन् ।
लताको निधनमा भारतलगायत विश्वभरका व्यक्तित्वहरूले शोक व्यक्त गरेका छन् । भारतीय प्रधानमन्त्री नरेन्द्र मोदीले लताजीका तस्विरहरू ट्विट गर्दै लेखेका छन्, ‘दयालु र सबैको ध्यान राख्ने लता दीदीले हामीलाई छोडेर गइन् । उनले हाम्रो देशमा यस्तो खाली ठाउँ छोडेकी छिन् जुन कहिल्यै भरिनेछैन ।’ केन्द्रीय मन्त्री नितिन गडकरीले लेखेका छन्, ‘उनको निधनले देशलाई अपूरणीय क्षति पुगेको छ । उनी सधैं सबै संगीत साधकहरूको लागि प्रेरणा हुन्।’
‘स्वर साम्राज्ञी’ मंगेशकरले सन् १९४२ मा मात्र १३ वर्षको उमेरमा आफ्नो करियर सुरु गरेका थिइन् । उनले हालसम्म धेरै भारतीय भाषामा ३० हजारभन्दा बढी गीत गाइसकेकी छिन् । उनलाई भारतको सर्वोच्च नागरिक सम्मान भारत रत्नबाट पनि सम्मानित गरिएको छ। यसबाहेक उनी पद्मभूषण, पद्मविभूषण र दादासाहेब फाल्के पुरस्कारबाट पनि सम्मानित भइसकेकी छिन् ।