‘गंगुबाई काठियावाडी’लाई नेटफ्लिक्समा रुचाइयो, २५ देशमा टप फिल्मको शीर्षस्थानमा
२२ बैशाख काठमाडौँ ।
बलिउड निर्देशक सञ्जय लीला भन्सालीको फिल्म ‘गंगुबाई काठियावाडी’ नेटफ्लिक्समा रिलिज भइसकेको छ । उक्त फिल्म अप्रिल २६ देखि नेटफ्लिक्समा २५ देशमा टप १० फिल्मको शीर्षस्थान रहन सफल भएको छ ।
एक हप्ताको अवधिमा ‘गंगुबाई काठियावाडी’ नेटफ्लिक्समा विश्वका धेरै देशमा सबैभन्दा बढी हेरिने गैर–अंग्रेजी फिल्म बनेको छ । आलिया भट्टको केन्द्रीय भूमिका रहेको फिल्मलाई एक हप्ताको अवधिमा १३।८१ मिलियन घण्टाभन्दा बढी हेरि सकिएको छ । क्यानडा, अमेरिका, बेलायत, दक्षिण अफ्रिका, अस्ट्रेलिया, न्युजिल्याण्ड र यूएईसहित २५ देशमा टप १० फिल्मको शीर्षस्थानमा रहेको छ ।
निर्देशक भन्सालीका अनुसार गंगुबाई काठियावाडी एक विशेष फिल्म हो, जुन महिलाका लागि न्यायको लडाइँमा गंगुबाईको कहानी वास्तवमै सार्वभौमिक छ । साथै दर्शकहरुले सिनेमा हलमा मात्र नभएर नेटफ्लिक्समा पनि मन पराइरहनु भएकोले निर्देशक भन्साली एकदमै खुसी छन् । नयाँ दर्शकले खोजिरहेको फिल्म व्यापक पहुँचमा पुगेको छ र नेटफ्लिक्समा यसको सफलता पुष्टि भइसकेको छ । फिल्मको सफलताका विषयमा आलियाले पनि खुसी साट्नुको साथै भारत बाहिर पनि नयाँ कथाको पर्खाइमा दर्शकहरु छन् भन्ने पुष्टि भएको बताएकी छिन् ।
‘गंगुबाई काठियावाडी’मा आलियाका अलावा शान्तनु महेश्वरी, विजय राज, इन्दिरा तिवारी, सीमा पाह्वा लगायतको पनि मुख्य भूमिका छ । अजय देवगण फिल्ममा केमियो भूमिकामा देखिएका छन् । ‘गंगुबाई काठियावाडी’ लाई नेटफ्लिक्समा उत्कृष्ट प्रतिक्रिया मिलिरहेको छ ।