नीति अनुसन्धान प्रतिष्ठान नेपालले तीन दिने अन्तर्राष्ट्रिय गोष्ठी गर्ने
नीति अनुसन्धान प्रतिष्ठान, नेपाल (नेनाप) ले तीन दिने अन्तर्राष्ट्रिय गोष्ठी गर्ने भएको छ ।
International Relations: Nepal and the World Order शीर्षक रहेको गोष्ठीको उद्घाटन शुक्रवार, भाद्र १० गते नेपालका सम्माननीय प्रधानमन्त्री शेरबहादुर देउवाले गर्नुहुने गोष्ठी–सचिवालयले जनाएको छ ।
कार्यक्रमको उद्घाटन एलिस रिसेप्सन, गैह्रीधारा, बालुवाटार काठमाडौंमा हुनेछ।
उद्घाटन समारोहमा विशिष्ट अतिथिमा माननीय परराष्ट्रमन्त्री डा. नारायण खड्का, परराष्ट्र सचिव एवं विभिन्न देशका कूटनीतिक नियोगका प्रमुखहरूको समेत उपस्थिति रहने आयोजकले जनाएको छ।
नेपालले भविष्यमा कस्ता नीतिहरुका आधारमा विश्वलाई हेर्ने भन्ने विषयमा यही भाद्र १० गतेदेखि १२ गतेसम्म सञ्चालन हुने गोष्ठीले गहन चिन्तन गर्ने जनाइएको छ।
कार्यक्रममा नेपाल र भारतका ४० वर्षभन्दा कम उमेरका ४० जना अन्तर्राष्ट्रिय सम्बन्धमा स्थापित शैक्षिक संस्था तथा विश्वविद्यालयहरूबाट विद्यावारिधि गर्नुभई वर्तमान समयमा विभिन्न सरकारी तथा गैरसरकारी संस्थाहरूमा महत्वपूर्ण भूमिकामा रहनु भएका विज्ञ युवाहरूले सहभागिता जनाउने तथा आफ्ना कार्यपत्रहरू प्रस्तुत गर्नुहुने जनाइएको छ ।
आयोजकद्वारा प्रेषित विज्ञप्ति अनुसार ‘आजको युवा मष्तिस्कले के सोचेकोछ र भविष्यमा त्यसलाई कसरी कार्यान्वयन गर्ने लक्ष्य युवाहरुका मनमा रहेको छ’ यस कुरालाई उक्त मन्थनले प्रकाशनमा ल्याउने छ । ‘अन्तर्राष्ट्रिय सम्बन्धका विषयमा नवीनतम विचारहरू युवा पुस्ताको मस्तिष्कबाट आओस् भन्ने यस संगोष्ठीको मुख्य उद्देश्य रहेको छ । नयाँ पुस्ताले यस विषयमा जे विचारहरू प्रस्तुत गर्नुहुनेछ भविष्यमा अन्तर्राष्ट्रिय सम्बन्धका लागि त्यही नै पाथेय बन्नेछ भन्ने आयोजकको विश्वास रहेको छ ।’
आगामी दिनमा एउटा सकारात्मक तथा सृजनात्मक विमर्श एवं संकथन खडा होस् भन्ने पवित्र उद्देश्यका साथ संगोष्ठी आयोजना गरिएको आयोजक प्रतिष्ठानले जनाएको छ ।
नीति अनुसन्धान प्रतिष्ठान नेपाल एउटा विशुद्ध नेपाली संस्था हो । राष्ट्रहितलाई सर्वोपरि राख्दै छिमेकी एवं अन्तरराष्ट्रिय सम्बन्धलाई सबल बनाउनको लागि प्रतिष्ठान निरन्तर प्रयासरत छ। विगतदेखि नै नीति अनुसन्धान प्रतिष्ठानले विभिन्न समयमा समसामयिक विषयहरूमा अन्तरक्रिया, गोष्ठी, प्रतिभा सम्मान, विचार विमर्श एवं नेपाल—भारत सम्बन्धका विविध आयामहरूमा द्विदेशीय सम्मेलन तथा अन्तर्राष्ट्रिय सम्मेलन आदि आयोजना गर्दै आएको छ ।