वैशाख ५, काठमाडौं । नेपाली चलचित्र ‘कैदीको पत्र’ को गीत ‘घरै बसुँ पिरै पिर हो’ सार्वजनिक भएको छ । यहि वैशाख १५ गतेबाट देशभर प्रदर्शन हुने यस चलचित्रको सार्वजनिक भएको गीतमा यसका प्रमुख कलाकारहरु पृथ्वीराज खत्री फिचर्ड छन् भने कुनाल विश्व र ब्रिटिश अभिनेत्री म्याडिसन लाजारसलाई पनि देख्न सकिन्छ। यो गीतमा सनम कुमार बैरागको शब्द रचना रहेको छ भने बिनम्र कर्माचार्यको संगीत तथा अभिषेक कार्कीको स्वर रहेको छ। सम्पूर्ण छायांकन स्कटल्याण्डमा भएको यो चलचित्रलाई बैरागले निर्देशन गरेका हुन्। प्रेम र रोमान्सको कथामा बनेको चलचित्रले जीवनमा पाएको खुशीलाई सम्हाल्न नसक्दा मानिसले व्यहोर्नुपर्ने उतारचढाव र भोग्नुपर्ने कठिनाइलाई चित्रण गरेको निर्देशक बैरागले बताएका छन् । यो चलचित्रमा समावेश भएका सबै गीतमा शब्द, चलचित्रको पटकथा तथा संवाद पनि निर्देशक बैरागले नै तयार पारेका हुन्। साहित्यकार स्व। ईश्वर मानन्धरले लेखेको कथा ‘कैदीको पत्र’ मा आधारित रहेर यो चलचित्र बनाइएको हो। यस चलचित्रमा कुनाल विश्व र ब्रिटिश अभिनेत्री म्याडिसन लाजारस, सलिना थापा मगर, पृथ्वीराज खत्री, सुवर्ण थापा, मनिष श्रेष्ठ, सुस्मिता थापा, क्यारी डोड्स, किरण कार्की, चरण प्रधान, विजेता श्रेष्ठ, फौस्तास तलग्का, लारेनवेस्टबरी र तपस्या शिवाकोटी लगायतका नेपाली तथा ब्रिटिश कलाकारको अभिनय रहेको छ । चलचित्रमा दिल घले, नानी बैराग, कैलाश विश्वकर्मा र हिराल जोशी निर्माता हुन् । यो चलचित्रमा रामशरण कोइरालाको मुख्य सहायक निर्देशन, रामेश्वर कार्कीको छायांकन, अर्जुन जीसीको सम्पादन र यासिन एनचौबीको रंग संयोजन गरिएको छ । https://youtu.be/7GGf0SxKCeo