श्री बौद्धनाथ क्षेत्र विकास समितिद्वारा स्वर्ण पदक खेलाडीहरूलाई पुरस्कारसहित सम्मान
७ असोज, काठमाडौं । श्री बौद्धनाथ क्षेत्र विकास समितिले स्वर्ण पदक बिजेता खेलाडीहरूलाई नगद पुरस्कार सहित कदर पत्रले सम्मान गरेको छ । मिति २०८० साल श्रावण २६ गते देखि २८ गते सम्म मित्रराष्ट्र भारतको नयाँ दिल्लीमा भएको १७औं अल इन्डिया स्वतन्त्रता दिवस कप अन्तर्राष्ट्रिय कराते च्याम्पियनशिप २०२३ मा नेपाल सितोरियो कराते डोजो प्रथम शाखा डोजो बौद्ध पिपलबोटबाट स्वर्णपदक विजेता खेलाडी प्रभात रोका मगर र छेयुङला शेर्पालाई पुरस्कारसहित सम्मान गरेको हो ।
सेतोकाइ कराते इन्टरनेसनल इन्डिया र भारत कराते एकेडेमीको संयुक्त आयोजना तथा कराते इन्डिया अर्गनाइजेसनको स्वीकृतिमा १७औं अल इन्डिया स्वतन्त्रता दिवस कप अन्तर्राष्ट्रिय कराते च्याम्पियनशिप २०२३ आयोजना गरेको थियो ।
श्री बौद्धनाथ क्षेत्र विकास समितिका अध्यक्ष राजकुमार लामाको अध्यक्षतामा भएको उक्त सम्मान कार्यक्रमका प्रमुख अतिथि प्रतिनिधि सभा सदस्य एवं अर्थ समितिका सभापति माननीय सन्तोष चालिसेले स्वर्ण पदक बिजेता खेलाडी द्वय प्रभात रोका मगर र छेयुङला शेर्पालाइ नगद पुरस्कार रु. १० हजार ( दश हजार) सहित कदर पत्रले सम्मान गरेका थिए ।
उक्त कार्यक्रममा प्रहरी वृत बौद्धका कार्यलय प्रमुख प्रहरी नायव उपरीक्षक राजु पाण्डे, श्री बौद्धनाथ क्षेत्र बिकास समितिको कार्यकारी निर्देशक शान्ती माया तामाङ ट्राफिक प्रहरी वृत बौद्धका कार्यालय प्रमुख प्रहरी निरीक्षक लेख नाथ मैनाली, श्री बौद्धनाथ क्षेत्र विकास समितिका सदस्यहरु शैलेश श्रेष्ठ, जानुका भण्डारी श्रेष्ठ, राग्वा शेर्पा, पशुपतिनाथ (श्याम) खतिवडा, सुरज रुम्बा लगायतको उपस्थिति रहेको थियो ।
कार्यक्रममा श्री बौद्धनाथ क्षेत्र विकास समितिका अध्यक्ष राजकुमार लामाले पदक बिजेता खेलाडीहरूलाई बधाई दिदै खेलाडीहरू राष्ट्रको गहना भएको बताए। उनले बौद्ध र नेपाललाइ अन्तराष्ट्रिय जगतमा पहिचान दिलाउन सफल भएकोमा खुसि ब्यक्त गरे। खेलाडीहरूको मनोबल बढाउन र खेलप्रतिको निरन्तरताको लागि पनि स्वर्ण पदक बिजेता खेलाडीहरूलाई क्षेत्र बिकास समितिले सम्मान गरेको बताए । बौद्ध नाथ क्षेत्र विकास समितिले खेलाडी र खेलकुद क्षेत्रको विकासका लागि विभिन्न कार्यक्रम गर्दै आएको छ ।