१० असोज, काठमाडौं । युथ फेस्टिबल कमिटिको आयोजनामा आईतबारदेखि शुरु भएको प्रथम दशैं खसी कप २०८० खुल्ला सेभेन ए साइड फुटबल प्रतियोगिता अजिमा कन्स्ट्रक्सनले जितेको छ । मंगलबार भएको खेलमा अजिमा कन्स्ट्रक्सनले ताहाचल फुटबल टिमलाई पेनाल्टी सुटआउटमा ३–२ ले पराजित गरेको हो । ताहाचल फुटबल टिम प्रतियोगिताको उपविजेता भई नगद रु २५ हजारका साथमा ट्रफी, प्रमाणपत्र, मेडल प्राप्त गरेको छ । विजयी अजिमा कन्स्ट्रक्सनले नगद रु ५० हजारका साथमा खसि खरिदका लागि थप २० हजार प्राप्त गरेको छ । आजै भएको सेमिफाइनलमा ताहाचलले जुनियर बौद्ध भेट्रानलाई १–० ले पराजित गरेर फाइनल पुगेको हो भने अजिमा कन्स्ट्रक्सनले कुरदान फुटबल एकेडेमी नैकापलाई १–० ले पराजित गरेर फाइनल पुगेको हो । प्रतियोगिता अन्तर्गत मंगलबार नै क्वाटर फाइनल, सेमि फाइनल र फाइनल खेल सम्पन्न भएका थिए । काठमाडौं महानगरपालिका वडा नं. ६ को बौद्ध फुटबल मैदानमा प्रतियोगिता आयोजना गरिएको हो । कार्यक्रम काठमाडौं क्षेत्र नं. ३ का संघीय सांसद सन्तोष चालिसेको प्रमुख आतिथ्यतामा भएको थियो । कार्यक्रममा संघीय सांसदहरु अशोक चौधरी, निशा डागी, वागमति प्रदेश सभा सदस्य विमल ठकुरी, छिरिङ दोर्जे लामा, गोकर्णेश्वर नगरपालिकाका उपप्रमुख सान्नानी लामा, नगर प्रवक्ता नारायण बहादुर सुवेदी, वडा नं. ४ का वडा अध्यक्ष जयराम महत लगायतको आतिथ्यता रहेको थियो । सामाजिक अभियन्ता मुस्कान खातुनको सभापतित्व रहेको थियो भने कार्यक्रम राजेश दाहालले गरेका थिए । प्रतियोगितामा ३२ टिमले भाग लिएका थिए प्रतियोगिताको रेफ्रि राष्ट्रिय स्तरका प्रदिप लामा र जोन महर्जन रहेका थिए ।