१४ मंसिर, काठमाडौं । पोखरा रंगशालामा भएको केपी ओली कप टी–२० क्रिकेट प्रतियोगिता खेलमा बागमती प्रदेशलाई ४ विकेटले हराउँदै  नेपाली सेनाको  त्रिभुवन आर्मी क्लब फाइनलमा पुगेको छ । जितको लागि १ सय २८ रनको विजयी लक्ष्य पछ्याएको आर्मीले १५ ओभरमा ६ विकेट गुमाउँदै पूरा गर्यो । आर्मीको जितमा भीम सार्कीले ३५ बलमा ५ चौकासहित ३९ रन बनाए । सोमपाल कामी १४ बलमा १ छक्कासहित १५ रनमा नट आउट रहे । आर्मीलाई ओपनर तथा कप्तान विनोद भण्डारीले १२ बलमा ३ चौका र २ छक्कासहित २५ रन बनाउँदै राम्रो सुरुवात दिलाएका थिए । कुशल मल्ल ८ बलमा ४ छक्कासहित २७ रनमा आउट । सन्तोष कार्की ७, रोहित पौडेल शून्य र बसिर अहमद ५ रनमा आउट भए । बागमतीका कप्तान सन्दीप लामिछानेले ४ ओभरमा ३४ रन खर्चिदा २ विकेट लिए । प्रतिश जि.सी, ईशान पाण्डे, रित गौतम र सोनु देवकोटाले १–१ विकेट लिए । त्यसअघि पोखरा क्रिकेट रंगशालामा टस जितेर पहिला ब्याटिङ रोजेको बागमतीले निर्धारित २० ओभरमा ७ विकेट गुमाउँदै १ सय २७ रन बनाएको थियो । बागमतीका प्रतिक श्रेष्ठ ३५ बलमा ३ चौका र ४ छक्कासहित ५० रनमा नट आउट रहे । सन्दीप लामिछाने २२ बलमा २ चौका र १ छक्कासहित १९, रित गौतम १४, ईशान पाण्डे १२ र गौरव खड्का ८ रनमा आउट भए । आर्मीका सोमपाल कामीले ४ ओभरमा २९ रन खर्चेर २ विकेट लिए । साहब आलमले ४ ओभरमा १ मेडनसहित १४ रन खर्चेर ४ विकेट लिए । विवेक यादवले १ विकेट लिए । आर्मीले उपाधिको लागि दोस्रो सेमिफाइनलमा मधेश र एपिएफबीचको विजेतासँग खेल्नेछ । फाइनल शुक्रवार हुनेछ ।