२१ साउन, काठमाडौं । सुदूरपश्चिम प्रदेशका मुख्यमन्त्री कमल बहादुर शाहले पद तथा गोपनीयताको शपथ लिनुभएको छ । एमाले र कांग्रेसको समर्थनमा आइतवार मुख्यमन्त्रीमा नियुक्त हुनुभएको शाहले सोमवार एक कार्यक्रमका बिच पद तथा गोपनीयताको शपथ लिनुभएको हो । 

प्रदेश प्रमुख नजिर मियाँले सोमवार एक कार्यक्रमका बिच शाहसँगै नेपाली कांग्रेस, नेकपा एमाले र नागरिक उन्मुक्ति पार्टीबाट भएका मन्त्री तथा राज्यमन्त्रीहरूलाई पनि पद तथा गोपनीयताको शपथ ग्रहण गराउनुभयो । 

एमालेबाट भौतिक पूर्वाधार विकास मन्त्री बनेका सुरेन्द्र पाल, आन्तरिक मामिला तथा कानुन मन्त्री बनेका हिरा सार्की, भूमि व्यवस्था कृषि तथा सहकारी मन्त्री वीर बहादुर थापाले शपथ लिनुभयो । 

कांग्रेसतर्फ आर्थिक मामिला मन्त्री बनेका बहादुर सिंह थापा, सामाजिक विकास मन्त्री मेघराज खड्का र नागरिक  उन्मुक्ति पार्टीबाट उद्योग पर्यटन वन तथा वातावरण मन्त्री बनेका लक्ष्मण किशोर चौधरीले शपथ लिनुभयो । 

त्यस्तै मुख्यमन्त्री शाहले एमालेबाट भौतिक पूर्वाधार विकास राज्यमन्त्रीको जिम्मेवारी पाएकी निर्मला साउँद, आर्थिक मामिला राज्यमन्त्री प्रकाश बम र सामाजिक विकास राज्यमन्त्री सरस्वती खड्कालाई पद तथा गोपनीयताको शपथ ग्रहण गराउनुभयो । 

योसँगै मुख्यमन्त्री शाहलेको १० सदस्य मन्त्रीमण्डल बनेको छ ।