१ ज्येष्ठ, काठमाडौँ । चेल्सीलाई हराउँदै लिभरपुलले एफए कप फुटबलको उपाधि जितेको छ । टाइब्रेकरमा प्रिमियर लिग क्लब चेल्सीलाई ६–५ ले पराजित गर्दै लिभरपुले एफए कपको च्याम्पियन बनेको हो । वेम्वली स्टेडियममा शनिबार राति भएको खेलको निर्धारित र थप गरिएको अतिरिक्त समयमा कुनै गोल निस्कन नसकेपछि टाइब्रेकरमा लिभरपुलले बाजी मारेको हो । प्रतिस्पर्धात्मक बनेको खेलमा दुवै टोलीबाट गोलका केही अवसर सिर्जना भएपनि सदुपयोग हुन नसक्दा खेल अतिरिक्त समय हुँदै टाइब्रेकरमा लम्विएको थियो । टाइब्रेकरमा लिभरपुलका ब्राजिली गोलरक्षक एलिसन बेकर नायक बने । उनले चेल्सीलाई दुई पेनाल्टीलाई बचाउँदै लिभरपुललाई सिजनको दोस्रो उपाधि दिलाउन सफल भए । एलिसनले चेल्सीको दोस्रो पेनाल्टीमा सेसर एज्पिलिक्वेटा र सातौ पेनाल्टीमा मासन माउन्टको प्रहारलाई बचाएका थिए । पाँचौ पेनाल्टीमा साडियो माने चुकेपछि टाइब्रेकर रोमाञ्चक मोडमा पुगेको थियो । त्यसपछि लिभरपुलले लगातार दुई गोल गर्दा चेल्सीले निर्णायक पेनाल्टीमा गोल गर्न सकेनन् । यो सिजनमा लिभरपुलले चार उपाधि जित्ने संघारमा रहँदा दुई उपाधि जितिसकेको छ । यसअघि लिभरपुलले लिग कपको उपाधि जितिसकेको छ । लिभरपुल प्रिमियर लिगको उपााधि नजिक रहँदा च्याम्पियन्स लिगको फाइनलमा प्रवेश गरिसकेको छ ।