फुटबल विवादः छानविन समितिले आज प्रतिवेदन बुझाउने
जेष्ठ ४ काठमाडौँ ।
नेपाली राष्ट्रिय फुटबल टोलीका मुख्य प्रशिक्षक अब्दुल्लाह अल्मुताइरीसँग खेलाडीको विवादको विषयमा छानबिन गर्न गठित समितिले आज प्रतिवेदन बुझाउने भएको छ । उक्त समितिलाई ७ दिनको समय दिइएता पनि निर्वाचन र सार्वजनिक विदाका कारण १० दिनपछि समितिले प्रतिवेदन बुझाउन लागेको हो ।
एन्फा महसचिव इन्द्रमान तुलाधरका अनुसार समितिले प्रतिवेदन दिएपछि मात्र एन्फाले आफ्नो कदम चाल्ने र आज प्रतिवेदन बुझाउने कुरा छ ।
गत आइतबार बसेको एन्फाको आकस्मिक कार्यसमिति बैठकले भूतपूर्व राष्ट्रिय खेलाडी भिक्टर रानाको संयोजकत्वमा पूर्व खेलाडी विदुर विष्ट र नेपाली राष्ट्रिय तथा अन्तर्राष्ट्रिय खेलाडी संघका उपाध्यक्ष दीपक थापा सम्मिलित समितिलाई यस घटनाको तथ्य खोज्न जिम्मेवारी दिएको थियो ।
समितिले पछिल्लो एक सातामा क्याम्प छोडेका १० खेलाडी, प्रशिक्षक अब्दुल्लाह अलमुताइरी लगायत अन्य घटनासँग सम्बन्धित व्यक्तिहरुसँग सोधपुछ गरेको थियो । एएफसी एसियन कप छनोट खेलका लागि नेपाली राष्ट्रिय टोलीमा रहेका १० जना खेलाडीहरूले आफूलाई क्याम्प छोडेर गएका थिए। आफ्नो आधारभुत आवश्यक्ताका विषयमा कुरा राख्दा प्रशिक्षकसँग खटपट परेको विषयमा खेलाडीहरुले क्याम्प छोडेर गएका थिए ।
त्यसपछि खेलाडीहरुले आफूहरुलाई न्याय दिनुपर्ने बताउँदै एन्फासँग अनुरोध गरेकाले कार्यसमिति बैठकले छानविन समिति गठन गरेको थियो ।