२५ कार्तिक, काठमाडौं । कोशी प्रदेशका पूर्वमन्त्री लिलाबल्लभ अधिकारी विराटनगरबाट पक्राउ पर्नुभएको छ । मानव तस्करीको आरोपमा उहाँलाई  प्रहरी अदालतको अनुमतिमा विराटनगरस्थित निवासबाटै पक्राउ गरिएको हो । 

उहाँलाई आजै दिउँसो हवाईजहाजमार्फत् काठमाडौं ल्याउने तयारीमा छ । 

गृहमन्त्रालय स्रोतका अनुसार मानव तस्कर गिरोहसँग मिलेमतो खुलिसक्दा पनि कोशी प्रदेशका निवर्तमान आन्तरिक मामिला तथा कानुनमन्त्री एवं सांसद लीलाबल्लभ अधिकारीमाथि अनुसन्धान सुरू नभएको भन्दै गृह प्रशासनको आलोचना भइरहेको थियो ।

मन्त्रिपरिषदबाट भ्रमण स्वीकृत नगराई उहाँ जापान जानुभएको थियो । उहाँसँगै अन्य ३ जना व्यक्ति पनि जापान गएका थिए । शंकास्पद कागजातका कारण जापानबाट फर्काइएपछि त्रिभुवन अन्तर्राष्ट्रिय विमानस्थलमा अघिल्लो शनिवार चारै जनालाई अध्यागमन कार्यालयले अनुसन्धानका लागि प्रहरीको जिम्मा लगाउने तयारी गरेको थियो । तर जापानको अध्यागमनले मन्त्री परिचयपत्रका कारण उहाँलाई विमानस्थलबाट फर्काइदिएको थियो । उहाँसँगै जापान गएकाहरुलाई पक्राउ गरेर प्रहरीले अनुसन्धान गरिरहेको छ ।

मानव तस्करको योजना अनुसार मन्त्री जापान पुगेको भन्दै विरोध भएपछि मन्त्री पदबाट उहाँले राजीनामा दिनुभएको थियो । शनिवार एमालेको कोशी प्रदेश कमिटीले राष्ट्रिय प्रतिनिधि परिषद सदस्य तथा पार्टीको संगठित सदस्यबाट उहाँ निलम्बित हुनुभयो ।