२५ कार्तिक, काठमाडौं । नेपाली कांग्रेसका नेता डा. शेखर कोइरालाले लोकतान्त्रिक व्यवस्थामा प्रत्येक जातजातिलाई आफ्नो भाषा, धर्म, संस्कृति, परम्परा र साहित्यको जगेर्ना तथा विकास गर्ने अधिकार हुने बताउनुभएको छ । आज आइतवार राष्ट्रिय विभूति महागुरु फाल्गुनन्द लिङ्देनको १४० औँ जन्म जयन्तीको अवसरमा आयोजित कार्यक्रमलाई सम्बोधन गर्नुहुँदै सो कुरा बताउनुभएको हो । 

किँरात धार्मिकस्थलका रुपमा रहेको इलामको लारुम्बास्थित माङसेबुङ क्षेत्रलाई धार्मिक क्षेत्र विकासका रुपमा विस्तार गर्नुपर्ने र  पशुपतिनाथ क्षेत्र विकासजस्तै गरेर विकास गर्नुपर्नेमा जोड दिनुभयो । 

साहित्य समाजको ऐना हो र यसको राजनीतिक सीमा नहुने बताउनुहुँदै थप उहाँले भन्नुभयो, “संस्कृतिको जगेर्ना गर्नुपर्छ, संस्कृति भनेको व्यक्ति, समाज र समुदायको पहिचान हो ।” उहाँले धार्मिक र आध्यात्मिक क्षेत्रको तपोभूमि नेपाल समस्त मानव जातिको आकर्षणको केन्द्रका रूपमा रहेको बताउनुभयो । यसक्रममा महागुरुको अवतरणले यो रमणीय भूमि पनि तपोभूमि भएर ज्ञान र चेतनाका प्रकाश विस्तार गर्ने केन्द्रको रूपमा पहिचान बनाउन सफल भएको नेपाली कांग्रेसका नेता डा. कोइरालाले उल्लेख गर्नुभयो । 

नेपालको संविधानले सबै नागरिकलाई समान हक अधिकारको सुनिश्चितता गरेको छ । राज्यव्यवस्थाको सयकडौँ वर्षको ढाँचा फेरिएको छ । तर ढाँचा फेर्दैमा कैयन सामाजिक मान्यतामा परिवर्तन नआएको उहाँले बताउनुभयो । 

कोइरालाले फाल्गुनन्दको अवतरणले ज्ञान र चेतनाको ज्योति प्रदान गरेको भन्दै फाल्गुनन्दले कोरेको बाटोलाई पनि सही ढंगले पहिचान गरी त्यसको संरक्षण सम्वर्धनमा लाग्नुपर्ने बताउनुभयो ।

जन्मजयन्तीका अवसरमा आयोजित कार्यक्रममा माङसेबुुङस्थित किँरात धर्मगुरु आत्मनन्द लिङदेनको समेत उपस्थिति थियो ।